Святой царь Давид Строитель
На «Поим…»
1. Пред Тобою же всяка выя преклонена, всяко колено преклоняется и всяк язык исповедание Твое возглашает, — и на мене, Слове, исповедающагося призри!
2. Образу Твоему уподобил мя еси и узою бытия чувственнаго и умнаго поставил еси, собрав и во мне, яко в Тебе, словеса сущих; аз же неблагодарен Тебе бых.
3. Естественныя силы не по закону употребив, от подобия отпадох и родих злое, чувства же моя вкушению видимых широко отпустих.
4. Дево, Поручительнице повинных, яже Слово оплотила еси плотию и кущею земною, совлецы с мене дебелость отчаяния, да, покаявся, прибегну к тебе!
На «Утвердитеся…»
1. Со естественною багряницею — самовластием — и царства сияния вверил ми еси; аз же страстем скверным в рабство продах себе, ибо «кто кем побежден, тот тому и раб».
2. Каиново убийственное помышление, сынов Сифовых похотливость, исполинов надменное хождение, пятиградцев скверны мерзость — паче их умножих, яко река злобы, вспять текущая.
3. Египетское жестокосердие, обычаи хананейския, жертвы рукотворенным, волшвения и гадания, плетения власов и прочая, от нихже неподобным быти заповедал еси, безстуднее самых их первообразов стяжах.
4. Сего ради бысть Дева и воплощение Слова, да Матерними ходатайствы спасутся грешницы, от нихже первый, средний и последний аз есмь, яко бездна, собрание потоков скверны!
На «Услышах…»
1. Царем Израилевым подражах, но беззаконным, и елико можах, заблуждах в кадении на высоких, и во смешении с язычники, и в поклонении силам небесным.
2. Ассирийское волхвование о вышнем движении, и планет и неподвижных звезд сочетания и расхождения, жребий, судьба и день рождения — яко не слышащий Божественных, к сим устремихся.
3. Еллинское непознание Бога премудростию Божиею и пренесение поклонения от Творца на тварь совершил есмь, егда коемуждо идолу страсти послужих.
4. Сего ради богомужне действова Превышний богов, да человечески познает страсти наша и божественно избавит от прегрешений проповедующих Богородицею Деву Матерь!
На «От нощи…»
1. Законы писанныя попрах, и новый со естественным, и закон ума, закону Твоему свидетеля, закону греха и плоти поработих.
2. Зверю, от всяких зверей смешенному, уподобихся, многоразличному и многообразному, иногда иначе являющемуся и вредящему по естеству коегождо.
3. Не убояхся серпа летящаго, иже ревностию смертною посекает клянущихся, якоже аз, присно ложно страшным именем Твоим.
4. Сего ради от кровей девических плоть Божия и новое смешение — Бог и человек, да ходатайствует Мати о отчаянием безнадежных, якоже аз!
На «Возопи…»
1. Подобно Соломоновой пиявице ненасытный, иных концев мира ищу обладати и пределы Божии, яко малыя и худыя для моего блудства и похоти, укоряю.
2. Зле пределы преступих и совокупих дом к дому и село к селу, и у немощнейших часть их восхитих, и подвизахся не имети соседа, яко един живый на земли.
3. Сопротивник бых всем уставом закона Твоего, и браки иноплеменными насилие ложу моему сотворих, и образы злыми соблазнив, в грех введох люди моя, якоже Израиля — царие его.
4. Сего ради Дева Мати и рождество новое Слова, да новое образотворение вторицею даст растленным грехом, егда пещию Матерних ходатайств расплавит все вещество согрешения!
На «Благословен еси…»
1. Сребро, яко землю, и злато, яко брение путное, сокровиществовах; поклонихся мамоне сребролюбия, якоже древнии Ваалу, и Астарте, и мерзкому Хамосу.
2. Слово святое и обличающаго во вратех возненавидех, льстецов же братское коварство усвоих, клеветников советы усладих себе и ложныя суды изрекох.
3. Слез вдовиц и сокрушеннаго плача сирот не помиловах, не упокоих утробы требующих, паче же Тебе, Христе, питаемаго малым их питанием.
4. Сего ради рождество Божие от жены человеческия, да земнородных человек заблуждение разрешает Дева, яко Мати Божия, и ходатайствует о грешных!
На «Благословите…»
1. Сия согреших во евангельских законах и заповедях Твоих, повелевающих подставляти ланиту и обнажатися ради нищих; и еже не клятися всяко, Законодавче мой, повелеваеши, и воззрение с похотию совершенным прелюбодейством полагаеши.
2. Аще и тако растлих вся чувства и всецело тление бых, но не воздех рук моих, ниже положих упования моего на бога чуждаго, ниже иноплеменную некую веру наставлением души сотворих, кроме тоя, юже научиша мя богословцы Твои!
3. И ныне, преклоняя колена сердечная, вопию, яко другий Манассия: ослаби ми, Владыко, ослаби и не погуби мене со беззаконьми моими, ниже помяни злых моих, ниже осуди мене в преисподних земли, яко Ты еси Бог кающихся, превозносимый горе силами небесными!
4. Воистину Богородицею тя проповедуем, нетленная Дево, и веруем, яко честь образа твоего на тебе восходит, якоже учат богословцы, и тем знаменуеши обращение грешных, якоже являет она, позорище обоих миров, краса Египта, преподобная Мария!
На «Величите…»
1. Егда предстанет час тонких и сухих издыханий, мимоидет страх царства и изсякнет слава, праздны будут утехи, увянет цветение, ин приимет скипетр, иному последуют воинства, — тогда помилуй мя, Судие мой!
2. Егда разгнутся книги в день судный, и аз, выю преклонив, предстану Тебе на испытание, Судии праведно судящу, служителем гнев дышащим, праведным блаженствующим, грешныя же огню биющу, — тогда помилуй мя, Иисусе мой!
3. Понеже исповеданием нача чувствовати и собиратися кость к кости и состав к составу, и в иссохшия вдохнул еси паки дух рождения, верую, яко исполнение воскресения совершит во мне Бог всецелым покаянием!
4. Простое, Совершенное, Трисолнечное и Единозарное, просвети зрение души моея, да узрю Тя, Свет, светом Господним, Духом Божиим, да возсияеши нам тогда во безконечныя веки!
5. Не виде солнце Девы Матере, разве тебе, ниже свет его — толико повиннаго, якоже аз; но аз ходатайством твоим, Царице, уповаю узрети свет Сына твоего и свет превечный!
