Песнопения ко Господу нашему Иисусу Христу
Жезлом Чермное море разсечеся, иссякоша глубины, и бездна бысть путь безоружным, вооруженным же гроб; песньми воспоим, яко славно прославися Христос Бог наш живый.
Слава Тебе, Боже наш, слава Тебе.
Иисусе сладчайший, Христе Иисусе, отверзи ми двери покаяния, Человеколюбче Иисусе мой, приими мя, к Тебе прибегающаго и тепле просящаго, Иисусе Спасе мой, прегрешений прощения.
Слава Тебе, Боже наш, слава Тебе.
Иисусе сладчайший, Христе Иисусе, исторгни мя из руки врага велиара, Иисусе, и сподоби мя одесную стати славы Твоея, Иисусе Спасе мой, от части шуих Избавителю мой.
Слава Отцу и Сыну и Святому Духу.
Иисусе сладчайший, Человеколюбче Христе Иисусе, прости ми грехопадения души моея и сотвори сердце мое, Иисусе, обителию Тебе со Отцем и Духом Святым.
И ныне и присно и во веки веков. Аминь.
Иисуса Христа Богородице, моли о непотребных сих рабех твоих, Всесвятая, да молитвами твоими, Пречистая, от мук избавимся мы, осквернившиися, и насладимся славы вечныя.
Святая Троице, вознеси днесь рог Церкве непреклонно, превыше естества, на высоте веры Твоея, основании непоколебимем, и в ней утверди нас.
Слава Тебе, Боже наш, слава Тебе.
Услыши, Человеколюбче Иисусе мой, раба Твоего, вопиюща Ти с покаянием, и избави мя, Иисусе, осуждения и муки, едине Долготерпеливе Господи, Иисусе сладчайший, Многомилостиве.
Слава Тебе, Боже наш, слава Тебе.
Возстави мя, Иисусе мой, раба Твоего падшаго, Иисусе мой; спаси мя кающагося, Иисусе мой, и от геенны избави, Иисусе, от осуждения и муки, едине Долготерпеливе Господи, Иисусе сладчайший, Многомилостиве.
Слава Отцу и Сыну и Святому Духу.
Время, Иисусе мой, еже дал ми еси, во страстех иждих, Иисусе мой; сего ради не отвержи мене, Иисусе мой, но паки призови, молю Тя, Владыко Иисусе сладчайший, и спаси мя.
И ныне и присно и во веки веков. Аминь.
Дево, Мати Иисуса моего, моли Его избавити нас от геенны огненныя, едина Бога Носившая, Предстательство скорбящих, Благодатная, и сподоби мя жизни безконечныя.
Спасе мой Иисусе, Иже спасл еси блуднаго, Спасе мой Иисусе, Иже приял еси блудницу, ныне и мене приими, Иисусе Многомилостиве, спаси! Милостив ми буди, о Иисусе Благодетелю, якоже Манассии, Благий Иисусе мой, яко един Человеколюбец.
Егда пророк виде тайну сокровенную, ужасся и возопи: яко положил еси милостию любовь крепкую, Отче, и Сына Твоего Единороднаго дал еси сыном человеческим во оставление грехов.
Слава Тебе, Боже наш, слава Тебе.
Исцели, Иисусе мой, души моея язвы, Иисусе мой, молю Тя, да исхитиши мя, Иисусе мой Благий, из рук душетленнаго велиара и спасеши мя.
Слава Тебе, Боже наш, слава Тебе.
Согреших, Иисусе мой Благий! Иисусе мой, спаси мя, прибегающаго под кров Твой, Иисусе сладчайший, Долготерпеливе и Человеколюбче, и Царствия Твоего сподоби мя.
Слава Отцу и Сыну и Святому Духу.
Никтоже согреши Тебе, Иисусе мой, якоже аз согреших, окаянный и недостойный; но паки Тебе молю, Иисусе мой: спаси мя и даруй ми жизни оныя наследие.
И ныне и присно и во веки веков. Аминь.
Всепетая, Иисуса Христа Мати, Того моли, да избавимся мук вси поющии тя, иже воистину Богородицею тя именуем и величаем.
Из тьмы грехов вопиют Тебе души наша, Многомилостиве Боже: светом Твоим незаходимым просвети нас и направи стопы наша, Благовестниче мира.
Слава Тебе, Боже наш, слава Тебе.
Ты еси похвала, Иисусе, ума моего и надежда отчаянныя души, Иисусе мой: избави мя осуждения, вопиющаго Ти: спаси мя, Иисусе Христе, окаяннаго.
Слава Тебе, Боже наш, слава Тебе.
Всецело, Иисусе мой, во страсти лукавства впадый, вопию Ти, Иисусе мой: руку помощи простри ми и возведи мя, вопиющаго: спаси, Иисусе мой сладчайший.
Слава Отцу и Сыну и Святому Духу.
Скверны ума имый, Иисусе мой, вопию Тебе: очисти скверну грехов и избави от глубины зла мене, неведением впадшаго, Благий Иисусе мой, молю Тя.
И ныне и присно и во веки веков. Аминь.
Христа родшая Дево, Мати Божия, Того ныне моли, да избавит всех верных и люди от осуждения, ибо, кроме тебе, иныя Ходатаицы и Избавительницы не вемы.
Во чрево прият Иону кит и не растли его, ибо тем прообрази тридневное погребение Твое, Иже погребение на Себе прият нас ради, Блаже; и глаголаше он стрегущим: о лживии, милость свою оставили есте днесь.
Слава Тебе, Боже наш, слава Тебе.
Иисусе сладчайший, Христе Иисусе долготерпеливе, души моея язвы исцели, Иисусе, и услади сердце мое, Многомилостиве, молюся, Иисусе Спасе мой, да величаю Тя спасаемый:
Слава Тебе, Боже наш, слава Тебе.
Иисусе мой, Христе Многомилостиве, исповедаюся Тебе, помилуй мя, о Иисусе Спасе, избави мя тления, Иисусе мой, ибо никтоже бысть тако блуден, якоже аз, страстный, о Человеколюбче; но Ты, Иисусе сладчайший, спаси мя.
Слава Отцу и Сыну и Святому Духу.
Иисусе мой, блудницу и блуднаго, Манассию и мытаря и всех грешников, первых и последних, превзыдох, Иисусе мой, страстьми и сквернами; но разбойника и ниневитян, Иисусе сладчайший, покаянию сподоби мя.
И ныне и присно и во веки веков. Аминь.
Иисуса моего Христа Богородице, Всесвятая Дево, доме Божий, Марие, едина нескверная, мене оскверненнаго и благих всецело истощеннаго ныне иссопом молитв твоих очисти и скорбящаго не остави, Благословенная.
Иисусе сладчайший, мира Свете и Сладосте, омраченныя души моея очи просвети, Сыне Божий, богосветлым Твоим светом; Иисусе, Пастырю сладкий, взыщи мя, да пою Тя, Свет невечерний.
Согрешихом, беззаконновахом, неправдовахом пред Тобою, ниже соблюдохом ныне, ниже сотворихом, Владыко, якоже заповедал еси нам, но не предаждь нас до конца, Вышний, отцев Боже.
Слава Тебе, Боже наш, слава Тебе.
Христе Иисусе мой, никтоже согреши на земли от века, Иисусе мой, якоже аз согреших, окаянный и блудный; сего ради вопию Ти, Иисусе мой, и молю Тя: милостив ми буди, Милостиве Иисусе, Господи, Боже отец наших.
Слава Тебе, Боже наш, слава Тебе.
Иисусе Христе, многажды обещах Ти, страстный, покаяние и солгах Ти, окаянный; и ныне паки, в безчувствии пребывая, пою Тебе: душу и ум мой просвети, Христе Благий, Благословенный Иисусе, Господи, Боже отец наших.
Слава Отцу и Сыну и Святому Духу.
Христе Иисусе, Тебе вопию: страхом Твоим пригвозди сердце мое, Иисусе мой, настави мя ко пристанищу тишины, Иисусе мой, да спасенный вопию Ти: милостив ми буди, Благословенный Иисусе, Боже отец наших.
И ныне и присно и во веки веков. Аминь.
Христа Иисуса Мати, Невесто страшная паче естества, моли, Всесвятая, о оставлении всех грехов моих, Дево, Бога плотию Родшая.
Святии Твои отроцы в Вавилоне, херувимом уподобльшеся, трисвятую песнь глаголаху: благословим Тя, поем и превозносим, всех Бога.
Слава Тебе, Боже наш, слава Тебе.
Тебе молю, Иисусе мой: якоже блудницу, Иисусе, избавил еси от многих грехов, тако и мене, Иисусе мой, избави и очисти ум мой оскверненный.
Слава Тебе, Боже наш, слава Тебе.
Последую, Иисусе мой, скотским сластем и скотом являюся воистину, Иисусе мой, страстьми уподобихся им; Спасе мой Иисусе, от скотства избави мя.
Слава Отцу и Сыну и Святому Духу.
Впадох, Иисусе мой, в разбойники губительныя, совлекохся одежды богоистканныя и лежу язвен; и сему избиенному возлей елей и вино милости.
И ныне и присно и во веки веков. Аминь.
Иисуса моего Бога Носившая, Богородице, неизреченно Того моли избавити от бед и скорбей нас, рабы и певцы твоя, Дево.
Ты едина блаженна еси в родех, Дево, яко возсия нам от тебе свет, сидящим во тьме, и просвети души наша; сего ради, Богородице, праведно тя величаем.
Слава Тебе, Боже наш, слава Тебе.
Превзыдох Манассию, мытаря, блудницу и блуднаго, Милостиве Иисусе мой, и разбойника делы срамными и безместными, Иисусе мой; потщися и спаси мя.
Слава Тебе, Боже наш, слава Тебе.
Всех от Адама, Иисусе, грешников, прежде закона и в законе, по законе и во благодати, превзыдох страстьми, окаянный; но Ты, Иисусе мой сладчайший, упокой мя.
Слава Отцу и Сыну и Святому Духу.
Не отлучи мене, Иисусе, от неизреченныя славы Твоея, да не будет ми части шуия, Сладчайший, но одесную со овцами сопричти мя, Христе Иисусе мой сладчайший, и упокой мя.
И ныне и присно и во веки веков. Аминь.
Иисуса Бога Носившая Богородице, едина неискусобрачная Дево, умилостиви Его, да избавит нас от бед и от огня будущаго.
Иисусе всесладчайший, души и ума моего Освятителю, Царю Христе Многомилостиве, Иисусе, спаси мя, Спасе мой Всесильный; не остави мене, Спасе мой, избави мя от всякия муки, Иисусе мой, сподоби мя части спасаемых Твоих, Иисусе мой сладчайший, и к лику избранных Твоих сопричти мя, Иисусе Человеколюбче.
Иисусе всесладчайший, апостолов Славо, мучеников Царю, похвало моя, Иисусе Всесильный, спаси мя, Спасе мой прекрасный и вожделенный, Христе, помилуй мя молитвами Родшия Тя и всех святых Твоих, апостолов и пророков, и святых небесных сил предстательством; Иисусе, райския сладости сподоби мя, Иисусе Человеколюбче.
Слава Отцу и Сыну и Святому Духу.
Иисусе всесладчайший, монахов Славо, постников Чистото и подвижников Украшение, Иисусе, спаси мя, Спасе мой Благий, и из рук змиевых избави мя, Иисусе, и возведи мя из рова преисподняго, и одесную со овцами Твоими сопричти мя, Иисусе Благий, труждающагося и обремененнаго.
И ныне и присно и во веки веков. Аминь.
Не ввери мене человеческому предстательству, Всесвятая Владычице, и во дни жизни моея не остави мене, но заступи и спаси нас скорбящих, ибо Ты еси Помощница, Всесильная Дево, Мати Божия, и врагов Низложительница, и иноплеменников Сокрушительница. Буди Споспешница богохранимому народу твоему, и граду, и поющим тебе, и избави христиан от всех напастей.
