Задостойники: песнопения, читаемые вместо «Достойно есть» в течение всего года
Бог Господь явися нам днесь: составите праздник и, веселящеся, приидите, возвеличим Христа с ваиами и ветвьми хвалящих: благословен Грядый во имя Господне во веки.
Возвеличи, Христе, Матерь Твою Богородицу, Еюже, Творец создания нашего, подобострастен быв, облеклся еси в плоть, избавляющую от неведения; Сию убо вси роди ублажают и Тебе величают.
Невместимаго Бога во чреве вместившую и миру радость родившую, тя величаем, Богородице Дево.
Душами очищеннии и нескверными устнами приидите, возвеличим безбрачную и всенепорочную Матерь Еммануилову, ко Рожденному от Нея ходатайство приносящую: пощади души наша, Христе Боже наш, и спаси нас.
Страннаго Владычня пребывания и безсмертныя трапезы на горнем месте высокими умы, вернии, приидите, насладимся, восшедшее слово от Слова научившеся, Егоже величаем.
Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.
Не рыдай Мене, Мати, зрящи во гробе Сына, Егоже во чреве без семене зачала еси: востану бо и прославлюся, яко Бог, и вознесу со славою верою и любовию непрестанно Тя воспевающия.
Ангел вопияше Благодатней: Чистая Дево, радуйся, и паки реку: радуйся! Твой Сын воскресе тридневен от гроба и мертвыя воздвигнувый; людие, веселитеся.
Светися, светися, новый Иерусалиме, слава бо Господня на тебе возсия; ликуй ныне и веселися, Сионе, Ты же, Чистая, красуйся, Богородице, о востании Рождества Твоего.
Величит душа моя вознесшагося от земли на небо Христа Жизнодавца.
Родила еси, Дево, непостижимаго естествы, Безлетнаго неизреченно; сего ради, Пречистая, вси вернии тя величают.
Апостоли, видевше схождение Утешителя, удивишася, како в виде огненных языков явися Дух Святый.
Радуйся, Царице Святая, матерей славо, дев око: не можем бо глаголати достойно похвалы рождества твоего; сего ради верою тя величаем.
Величай, душе моя, на Фаворе преобразившагося Господа.
Рождество твое нетленно, Дево: Бог из ложесн твоих произыде воплощен и с человеки поживе; темже тя, Богородице, вси праведно величаем.
Ангели Успение Пречистыя видевше, удивишася, како Дева восходит от земли на небо.
Побеждаются естества уставы в тебе, Дево Чистая: девственное рождество и смерть живоносная; по рождестве Дева пребываеши и, умерши, жива еси, Богородице; праведно тя величаем.
Величит душа моя от неплодных рожденную Деву Марию.
Ужасеся о сем небо, и земли удивишася концы, егда Бог тобою явися человеком и чрево твое превыше небесных престолов показа; темже тя, Богородице, ангели и человецы, якоже достойна еси, величают.
Величит душа моя пречестный Крест Господень.
Таинственный еси, Богородице, рай, невозделанно возрастивший Христа; мы же, Крестом жизнь облекшиеся, на земли насажденное древо ныне возносим, покланяемся и тя величаем.
Ангели вхождение Пречистыя видевше, удивишася, како Дева вниде во Святая Святых.
Кивота законнаго не можаше коснутися рука всякаго; зде же днесь устны нас, верных, гласом немолчным тако с Гавриилом да глаголют: радуйся, Благодатная, Господь с тобою.
Величай, душе моя, Честнейшую и Славнейшую горних воинств, Деву Пресвятую Богородицу.
Подобает молчание, понеже не можем достойно восхвалити тя днесь, Богородице; но да не умолчим от страха, но по силе нашей принесем песнь, еюже тя возвеличим.
О тебе радуется, Благодатная, всякая тварь, ангельский собор и человеческий род, освященный храме и раю словесный, девственная похвало, из неяже Бог воплотися и Младенец бысть, прежде век сый Бог наш: ложесна бо твоя престол сотвори и чрево твое пространнее небес содела. О тебе радуется, Благодатная, всякая тварь, слава тебе.
Величай, душе моя, Честнейшую и Славнейшую горних воинств, Деву Пресвятую Богородицу.
Не можем, земнии, славити тя по достоянию, и небеснии изнемогают, Богородице, ибо превыше их была еси; приими веру нашу, веси любовь нашу, и яко свет христианства тя величаем.
Богородице Дево, упование христиан, покрый, соблюди и спаси на тя уповающих.
Писаниями закона научихомся мы, вернии, яко всяк младенец мужеский пол, разверзаяй ложесна, свят Господу наречется; се, днесь видехом Первенца с небесе и на земли и верою величаем.
Благовести, земле, радость велию, хвалите Матерь Бога Небеснаго.
Кивота законнаго не можаше коснутися рука всякаго; зде же днесь устны нас, верных, гласом немолчным тако с Гавриилом да глаголют: радуйся, Благодатная, Господь с тобою.
