Песнопения святому и животворящему Столпу, Хитону Господню и Соборной церкви (Светицховели)
Предвечный Боже и присносущий, Слове Отчий, премудростию вся устроивый, даждь и мне, глаголющему, премудрость и слово, да достойно украшу праздник святаго и животворящаго Столпа.
Архангели днесь с земными ликуют светло и сладкогласно воспевают со славою хвалу святаго и блаженнаго Столпа, всехвальный праздник, имже бысть избавление наше.
Соберитеся днесь, соборы верных людей, и хвалами воспоим праздник сей пресветлаго, святаго и блаженнаго Столпа, праздник всепросвещенный, имже бысть спасение наше.
Столпе всекрасный, чудес Божиих явителю, не руками человеческими носимый, но превыше воздуха висящий неизреченным смотрением Бога и Царя.
Всесветлый, и светотворящий, и просвещающий сердце и ум всех уповающих на тя: якоже чудесно Бог сотвори тя ведомым, тако и ты чудесно спасаеши всех и избавляеши от напастей призывающих имя твое.
Столп сей богосветлый, от негоже блистают лучи света и испущается благоухание, духовно обогащающее молящихся, приидите, людие, воспоим и прославим, и ублажим блаженную Нино, матерь нас, грузин, сподобившуюся видети чудо Столпа. Блаженная и святая жена, и от небесных сил всехвальная, еяже слез нектар бысть виною странному и человеками неизглаголанному видению пресветлаго Столпа, егоже множество людей не можаше подвигнути, — руками невидимыми вознесена узре его и благодаряше Бога.
Днесь светло явися нам святый и всехвальный праздник Столпа Животворящаго, имже вкушаем душеспасительное сладости источника миро, безсмертие и обожение подающее, возвещающее нам будущее оное Царство и наслаждение безпредельныя любви.
Приидите вси к нам, светом облеченнии людие, чада Соборной Церкве, приявшии печать крещения, и друг ко другу ликуйте и воспевайте: ибо празднует и веселит купно чада своя, возрожденныя в купели безсмертной.
Прииде радость, прииде ныне жизнь, прииде всего мира просвещение, ибо Невеста Христа Бога, святая и богосветлая Соборная Церковь, уготовляет нам брак не плотский, но небесный, безсмертный, и вечное наслаждение, в немже да радуемся.
Радуйся, Столпе Животворящий, святым и освящающим миром напаяющий души верных и обожающий всех, к тебе прибегающих. О святая пища, сладкая вкушающим и благоуханная, чувства просвещающая, души веселящая, в высоту небесную, яко молния, возносящая огнезрачными крилами, опаляющая духов злобы и сопротивных, достигающая же престолов царских и почивающая во веки!
Радуйся, блаженная мати, омраченную душу грузин, первее в бездну адову шествующих, премудростию Божиею обуздавшая, яко снег убелившая художнице, яко злато очистившая и освятившая, Соборную Церковь, яко утробу душ наших, уготовавшая, в нейже присно веселятся и Богу поют и славят хвалами, Иже Столп в украшение Церкви и нам в надежду дарова.
Радуйся, Столпе святый, егоже племена земная и Ангели небеснии со страхом величают, и единогласно зовем: Столпе Животворящий, солнца светлейший и эфира видением высший, зари и молнии светы затмевающий, руками человеческими неприкосновенный и неискусный, Ангелами же носимый, ходатайствуй о нас и покрый нас от напастей.
Днесь Премудрость Божия и Слово Отчее уготова престолу Своему славу непостижимую и всячески безпредельную, и Столп Животворящий, иже светом оным пресветлым блистает и исполняет весь мир благоуханием Божественным, празднует и просвещает души и сердца поющих и чад своих и дарует нам жизнь и велию милость.
Сему Столпу Животворящему, егоже невидимо Ангели воспевают, поют и славят, мы же, чада его, видимо окрест предстояще, веселимся и глаголем: радуйся, Столпе, от земли на небо вознесенный и превыше воздуха носимый не вещами человеческими, но руками ангельскими невидимо, покрывающий присно к тебе прибегающих.
Две сия реки, семо и овамо сокрушающия соблазны и очищающия скверны, иже высокогласно ликующе веселятся и украшают праздник, и с нами гласом зело страшно шумят и Столп Животворящий восхваляют: радуйся, Столпе святый, страже и хранителю наш и чад твоих, имже и мы славою твоею блаженни бываем.
О мати всепредивная, видение оное, паче разума, узревшая и нектаром слез напоившая помост, на немже стояла еси! Сего ради ужасеся душа твоя, зрящи невидимое восхождение Столпа на небо, и удивилася еси, егда паки сведе его Бог на спасение наше.
О апостольский оный дух, иже, яко молния, яко стрела избранная, прилете, уязвляя и прогоняя духа бесовскаго, человеческия же очеса отверзая и тьму идольскую всецело сокрушая, и Столп света светом нам явивый, егоже присно имамы надеждою и прибежищем нашим.
О чудо чудес — Столп, надежда и стена рода грузинскаго, иже невидимо посреди нас стоит! Сей не покорися поднятию многих тысящ рук, но без рук человеческих вознесеся и, паки снизшед, между небом и землею стоит и во веки хранит сие царство.
Небеса с землею, и земля с рожденными ее, и небо со светилами своими, солнце и луна со звездами, и паки земля со всеми рожденными ее, купно вси воскликните; скоти, со зверьми польными мир сотворите; растения же и садове разноцветнии, преславнии польстии и пустынстии, плодоноснии плоды и благоуханнии, благоухание испустите, и единодушно соберитеся, воспойте и восхвалите, и с радостию да взыграют и живая: ибо Столп святый животворящий светло людем своим благовествует духом и исполняет пищею безсмертия.
Слава…
Сей Столп преславный от Бога издревле познан есть: ибо древле с великим Моисеем путешествоваше и израильтян добре и безпогрешно водяше Божиим светоносным водительством; в продолжение четырех десятилетий израильтяном, в пустыни живущим, время стояния и шествия указуя, безпечалие подаваше, Амалика же и фараона немилостиво поражая, Божественным смотрением дивная чудеса творяше; ныне же превыше действует среди всех, неверных сокрушая, верным же — сила и жизнь.
И ныне…
Приидите вси, чада света, сынове купели, любители праздника, и узрим странное зрелище.
Столп блистает и светло лучи, яко молния, испущает, Хитон же возсиявает, яко заря, и сияния света, яко солнце, возблистают; небо же Церкве сияет и светом сугубым твердь бывает; праздник же дышит благоуханием, и мы, вернии, радостно веселимся.
Се, при соединении светов, ликующе, воспеваем, тако глаголюще: Сыне Божий, Вино светов, покрый от напастей с верою покланяющихся Тебе и Матери Твоей.
Свет трисиянный непостижимый, Троицу Пресвятую, светов Вину и святыни источник всесильный, прославим и хвалою возопиим, глаголюще трисвятую песнь:
Свят Отец Бог, присно безначальный,
Свят Сын Бог, соприсносущный,
Свят Дух Святый, Бог со Отцем и Сыном.
Свет, от Света посланный, святый Хитон Господень Иисуса Бога, и Столп Животворящий, и престол Божий со трепетом да хвалятся, и Вине светов воспоим, глаголюще:
Свят Отец, Родитель Сына безначальный,
Свят Сын и Слово Отчее всесильное,
Свят еси Ты, Безсмертный Душе Святый.
Светы, от Света просиявшии, солнца светлейшии и славнейшии вселенныя, превозноситеся днесь; отроцы, чада Соборной Церкве, вопиюще, глаголите:
Свят престол высокий и превознесенный,
Свят Хитон святый блаженнаго Иисуса Бога,
Свят еси ты, Столпе Животворящий святый.
Трубы, возгремите по концам земли, и, небесныя силы, иже на высоте есте, яко молния, блистайте, вейте и летайте непрестанно, и ко всем племенем глаголите и шумом ликуйте: потщитеся вси, ибо Сын Божий празднует и уготовляет брак в Своем жилищи, и святейшим Столпом, посреде его сущим, яко сосцем, питает всех и безсмертием напояет миром неоскудеваемым. Сей Столп израильтян в пустыни четыре десятилетия питаше и безпогрешным водительством право ведяше. Сей же на Фаворе и на Иордане Сыну Божию послужи. Мы же вопием: Чудотворче Господи, слава Тебе.
Престол Божий высокий, небесем уподобленный, имеющий посреде Столп во утробе, яко мати, и чада своя блистанием благовествуя веселит, и благодатей бездну источает — миро оное святое, златый нектар, росу Духа.
Небо, престоле Божий и Столпе просвещающий, Пресвятая Богородице, от пророков и отцев Столпом огненным света, святым и непорочным, предзнаменованная, покрый и сохрани нас в мире от всех злых напастей.
Якоже двумя проповедниками, во образ реки, великий Андрей и преподобная Нино сокрушиша всю мерзость идольскую страны грузинския, тако и сии две реки сокрушают всякую скверну и благий плод напаяют непрестанно.
Богом воздвигнутому сему Столпу, воздух разсекающему, высоты эфира, яко молния, достигающему и паки к нам на веки милостию возвратившемуся и посреде нас ставшему, воспоим с дивным Давидом и рцем: благословен Грядый к нам во имя Господне, Иже присно пребывает и сияет во веки веков; и паки возопиим и рцем: дому Твоему подобает святыня, Господи, в долготу дний (Пс. 92:5); спаси нас, Живый в вышних.
На «Поим»: «Мановением…»
Свете от Света, Христе, Слове Божий, даждь ми слово и разум во отверзение уст, да светы Твоя хвалами украшу — Церковь и Столп святый.
Столпе Животворящий, сиянием твоим просвети очи души моея, да горе имею я присно, идеже свет Божества пребывает присно.
Хитон святый Избавителя, иже абие, яко восхищением, прииде прежним смотрением туда, идеже уготовляшеся престол Божий, емуже со трепетом покланяемся.
Хвала Богу единому, всемогущему, Иже омраченных нас избави от горькаго рабства идолов, и свободны сотвори, и свет Божественный излия на ны.
Троице Святей, трисветлей, воспоим, восхвалим и прославим, ибо образ света Ея, Столп Животворящий, яви нам, верным.
Отроча мало, Христос Бог, иже горстию содержит и управляет небесными и земными, — Сего Дева святая роди нам плотию: Ты спасаеши души наша.
На «Утвердися»: «Боже, Спасе наш…»
Боже, Спасе наш, Создателю всех, словом утвердивый небеса высокая, Ты же, Спасе, утвердил еси святую Церковь и в ней Столп святый, иже пребывает на поклонение нам.
Столпе святый, окрест тебе мы предстоим, и Ангели невидимо с нами ликуют: се, днесь приидохом, воспоим Даровавшему нам Столп святый, освящающий души наша.
Святую Нино, апостола, матерь страны грузинския, громом сокрушившую Армази, святаго же Столпа нектаром блаженных слез своих нам в надежду даровавшую, украсим песньми и хвалами.
О мати блаженная, видениями чудес паче естества сподобльшаяся: егда в реке черныя птицы убелишася, тогда предзнаменовася Божественное крещение.
Отцу поклонимся, Сына превознесем и Духа Святаго прославим, Триипостасную Святую Троицу, едино Божество, исповедуим, Столп Животворящий уготовавшую нам в надежду и спасение.
О Мати и Дево, Света Столп предызображающая, Столпом же именуемая, юже со страхом величают Херувими, и мы с ними с трепетом поем и хвалим тя непрестанно.
На «Услышах»: «Христос Бог…»
Христе Боже, премудростию вся устроивый человеколюбием нас ради и сугубаго ради бытия, здешняго и будущаго, слава благости Твоей.
Света Столпе, огнезрачный, опаляющий безбожный народ: егда в храм твой приидоша язычницы и разграбити покусишася, ты огнем попалил еси их.
Егда языческии народи, сокровище мнящии, дерзостно руку простроша, огнь изыде и немилостиво пояде окаянных, мы же поклоняемся Христу.
Сокровище честное, паче всякия памяти благ превысшее, яко не познаша славы твоея варвари, сего ради и воздадеся окаянным достойное наказание.
Разделяемая Ипостасьми, нераздельная же Божеством, трисветлая, единосияние, Отче, и Сыне, и Душе Святый, спаси нас.
Се, ублажаем тя вси, якоже прорекла еси, Пресвятая Мати Божия, ибо от тебе рожденный Бог днесь с народом Своим уготовляет праздник.
На «От нощи»: «К Тебе утренюем…»
Ты еси свет и сияние неизреченное, твердь и солнце превосходящий, Столпе Животворящий: сохрани покланяющихся тебе.
Огнь Божественный, Солнце правды Христос, ризу Свою дарова нам в покров телесем и душам нашим, ейже мы со трепетом покланяемся.
Столпом Животворящим миро нам, яко сосцами, источает, в Хитон же пеленает нас Иисус Избавитель и тако убеляет нас. Слава благости Его.
Престоле пространный, на земли, яко небо, основанный, веселися, ибо Бог в тебе царствует; мы же, чада твоя, днесь радостно воспеваем тебе сладкогласно.
Богословием во едином естестве славится Троица, смотрением же Сын Божий — в двух естествах; но всех трех единым Божеством знаем и единосущну покланяемся.
О чудо! Дева святая раждает без мужа и пребывает Девою, чужда бывши уставов человеческих; мы же сего ради покланяемся.
На «Возопи»: «Якоже Иона…»
Чины Ангелов, невидимо поющии окрест тебе, Столпе Животворящий, нами видимый, — и мы с ними славим украсившаго тя Бога.
Лукавии варвари, сокровище сокровенно мнящии, егда разграбити покусишася, изыде огнь, немилостиво поядающий их до основания.
О сокровище, воистину безценный Столпе, не человеки огражденный, но Ангелы, рукам же человеческим неприкосновенный!
За дерзкое покушение разграбити тя скоро воздадеся отмщение лукавым варваром, егда немилостивии немилостиво абие огнем попалишася.
О Троице, собственно Тебе покланяющихся, разделяемо и нераздельно, Триипостасну и единосущну, покрый нас от всех зол и напастей.
Радуйся, Царице, надеждо, и покрове, и стено всех покланяющихся тебе верных, Сыном твоим запечатленных.
На «Благословен»: «Отроки в Вавилоне…»
Отроком в Вавилоне огнь прохлаждающий, яко вода, образом Столпа просвещаше, и духом невредимым глаголаху: Боже, Ты благословен еси.
Отроком купель вместо капища дарует нам Христос Царь и вместо крове миром обоняет нас: о изменение сие, Чудотворче Боже, благословен еси!
Отроком, на заклание к капищу Армазскому ведомым, сатана ликоваше и веселяшеся; ныне же, на крещение грядуще, отроцы Христа благословят.
Отроческое пение чад престола Твоего приими, Сыне Божий, иже ризе Твоей и Столпу святому песньми ликуют и Тебе благословят ныне и во веки.
Боже богов и Господи господствующих, Святая Троице, Едино Божество, покрый нас, исповедующих Тя верою, да благословим Тя.
Пресвятая кадильнице злата чистаго, благоухания исполненная, удивляющая обоняние человеков, — сего ради благословим тя и от тебе Рожденнаго.
На «Благословите»: «Иже един…»
Иже един есть Царь славы, Благий уготова праздник Столпа Животворящаго, иже светит блистательно в теле Соборной Церкве.
Днесь радуются чада Церкве о празднике престола высокаго, иже веселится богосветло о Столпе святом: сего ради, людие, превозносите во веки.
О Хитоне Божественный, над нимже, яко молния, яко солнце, светит тебе Столп всесвятый, и невидимо лицы Ангелов, ликующе, поют и Христа благословят во веки!
Блаженная Нино, Картли спасительнице, избавившая от тьмы прелестей души наша и питающая нас пищею безсмертия, еже есть святое благовонное миро.
Троице Боже, в трех Ипостасех познаваемый и единым Божеством покланяемый Едине, неслиянно и нераздельно исповедуемый, поем и благословим Тя ныне и во веки.
Радуйся, Мати Божия Пречистая, еяже жребия сподобихомся мы, грузины; блаженни есмы тобою, Пресвятая, иже присно покрываеши нас и печешися о нас, и мы благословим тя во веки.
На «Величите»: «Носившая…»
Свет солнца обезцвечивающий и лучи его всецело затмевающий, эфир солнечный и зарю дневную всеми победами превзойти сподобивыйся, Столпе свете, светлейший светов!
Огнем Божества окрест опаленный, имже избавляемся огня вечнаго, — той един в тебе горяше присно, ты же пребыл еси невредим, безсмертие подая душам нашим, Хитоне святый Божественный.
Блаженная мати Нино, громом сокрушившая капища и требища и ниспровергшая вся кропильницы их, и возсиявшая нам, во тьме неведения седящим, свет Божества.
Иногда плачевный граде Мцхето, при кичении и веселии бесов в тебе, се, ныне радуйся и празднуй: вместо кичения поют в тебе чада Церкве во веки.
Радосте и похвало всех верных, Святая Троице, Тя неслитно чистым сердцем величаем и поем со страхом и трепетом: Боже, сохрани нас присно, во едино Божество Тя исповедующих.
Златая палато святая, небесам невместимаго Бога во утробе вместившая, Невесто, неопалимо соблюденная, радуйся, хранительнице душ и телес наших от всякаго зла.
Праздник Соборной Церкве и свет святаго Столпа и Хитона Господня собирает концы мира и в пищу святую миро источает нам, покланяющимся святой Богородице и от нея рожденному Христу, да обрящем жизнь душам нашим.
Прииде радость и слава всего мира, ибо святая Соборная Церковь веселит чада своя, и праздник Столпа Животворящаго уготовляет, и святое миро обильно всем разделяет, и пищею безсмертия угощает имущих упование и веру твердую и непоколебимую, да ходатайством ея дарует Бог душам нашим велию милость.
Радуйся, о блаженная мати Нино, апостолов похвало и жен славо, яже подвигом и трудом твоим, и присными молитвами и постом сподобилася еси блаженнаго видения, единым Ангелом достойнаго: ибо Столп, человеческим рукам неподвижный, вознесенный неприкосновенно на небо узрела еси, и паки, нектаром слез твоих низведенный, посреде неба и земли, неприступный вещем человеческим, пребывает во веки и покрывает души и телеса наша.
На «Поим», глас 4-й: «Море непроходимое…»
Отверзи уста моя и исполни я благодати, да изреку слово, Слове Отчий Единородный, подобающее и достойное, в похвалу престола Твоего и Столпа Животворящаго.
Соберитеся, соборы духовнии верных людей, и хвалами воспоим праздник сей всесвятаго высокаго престола, и Столп всесвятый прославим и поклонимся ему.
Столпе всесвятый, свете и сияние, солнце незаходимое, светящее в души и умы верных, иже исповедуем тя надеждою и с верою покланяемся тебе.
На «Утвердися»: «Поющих Тебе…»
Небу подражающему престолу, иже посреде утробы Столп имать, яко сосец, и неоскудно источает нам святое миро, яко млеко, — сему воспоим и восхвалим.
Столпе пресветлый и свете, светом твоим огради чада твоя, иже, окрест предстояще, воспеваем пение и хвалу Божественныя красоты.
Се, башня блаженная, объемлющая свет и сияние, вещьми не сокрываемое, — премудро и богокрасно созданное дело Бога оного.
На «Услышах»: «Узрев…»
Мати оная блаженная, еюже Христос Бог дарова апостольство, сподобися дивнаго вознесения невидимаго Столпа и паки низшествия.
О блаженный Столпе, странно видимый от святыя жены, на воздух небесный вознесенный и паки милостию Божиею снизшедый и с нами пребывающий!
Столпом света пресветлым проповеданная и предзнаменованная от святых отцев и пророков, Владычице святая, Мати Божия, ходатайствуй о нас.
На «От нощи»: «Ты, Господи…»
Ты еси Столп, свет светов, иже, яко молния, блисташе на Иордане и на Фаворе, свидетельствуя о Сыне Божии.
Во образ твой явил есть Столп света, Столпе света Дево, от тебе носимый Бог; сего ради покланяемся тебе с Ним.
На «Возопи»: «Впадох…»
Древния и отеческия оны законы и рукотворенная капища изменишася нам дивно, и вместо их имаши святый престол, и миро, и Столп Животворящий в надежду нам.
О Божественное изменение сие: престол вместо Армази, и миро вместо рукотворенных, вместо же капищ — Столп святый Животворящий дарова нам Сын Божий!
От земли на небо достигшая и на небеси вселившаяся, с нами же присно пребывающая, Столпе Животворящий, Владычице святая, ходатайствуй о уповающих на тя.
Превышнему поборнику моему и непобедимому помощнику, Столпу святому и богосветлому, иже светит над Господним и свыше истканным Хитоном, и, яко молния, облистает небу подражающий престол, и поющих празднолюбцев своих украшает, и, яко заря, сугубыя радости дарует хвалу приносящим: радуйся, Столпе Животворящий!
Се, соберитеся на праздник сей святый Господень, концы земли, и Ангели с человеки, вси купно единением духа, пророцы и патриарси, апостоли, мученицы и святители, лики отцев и дев; потщитеся вси и прилетите, ликуйте, взывайте и вопийте, ударяйте в гусли, пророцы и вси святии, разгните писания в похвалу Столпа Животворящаго и глаголите:
Радуйся, Столпе святый и Животворящий, ибо над Хитоном Божественным, яко заря, возсияваеши!
Радуйся, Столпе, просвещающий концы небесе, плодоносящий души безсмертием!
Радуйся, Столпе блаженный, присно светлым оком взирающий на святый Хитон!
Радуйся, блистающий, яко молния, и святое миро верным источающий!
Радуйся, Столпе Божественный, дающий вкусити сладость душам!
Радуйся, Столпе, собеседниче и таинниче великаго богослова Моисея!
Радуйся, путеводителю и спутниче израильтян!
Радуйся, новаго закона предзнаменование, на Фаворе и Иордане Самому Богу послуживый!
Радуйся, свете, Света свидетелю, яко Сына Возлюбленнаго!
Радуйся, отцев пустынных подвижников и святых мучеников надеждо, по временам видимое сияние!
Радуйся, солнечные златовидные лучи в сердца верных, яко стрелы, пущающий!
Радуйся, в Сионе на апостолов двенадцатью частьми, яко языки огненными, низблиставый!
Радуйся, паче же Пресвятую Богородицу предызображающий, от земли прозябшую и до небес вознесшуюся, яже с Богом соедини нас!
Радуйся, Столпе Животворящий!
Ангельски пресветло и вышними силами хвалами воспеваемый, всю же вселенную чудесами осиявающий, — видевше и познавше, в удивлении стояще, вопием к тебе, глаголюще сице:
Радуйся, егоже сиянием светится поднебесная!
Радуйся, егоже чудесы блистает мир!
Радуйся, солнце незаходимое, всесветлое!
Радуйся, свете светов, блистанием побеждающий!
Радуйся, ибо над святым и блаженным Хитоном, яко заря, возсияваеши!
Радуйся, ибо, яко молния, облиставаеши престол Сына Божия!
Радуйся, оскудевшия веры обновление!
Радуйся, идольския злобы губителю, истинныя же веры явителю!
Радуйся, светом облекий живущих на земли!
Радуйся, потребивый сыны Агарины беззаконныя и воздвигший рог спасения!
Радуйся, поборниче непобедимый христиан, Бога с человеки примиряющий!
Радуйся, стяжавый люди избранныя, род святый и царский!
Радуйся, имже покланяются Создателю!
Радуйся, Столпе Животворящий!
О Божественная радость!
О праздник преславный!
О, коль великая сладость, душу обезсмерчивающая, ибо изображающим Святую Троицу — престолу Божию, Столпу света и святому Хитону Господню — народ верных поет и хвалу приносит, емуже и Ангели ликующе воспевают!
Радуйся, престоле Бога Света!
Радуйся, Хитоне, Свет объявый!
Радуйся, Столпе Животворящий!
На «Благословен»: «В пещи…»
В пещь адову прежде шествовавшии, милостию избавленнии, возопиим и рцем: благословен еси, Господи.
У капища Армазскаго прежде отроцы закалаеми бяху и плакаху, ныне же пред Столпом в купели крещаются и вопиют: благословен еси, Господи.
Радуйся, Богородице Дево Пречистая! Столпе, утверждение наше, яко молния, просвещающая и озаряющая душу, сердце и ум наш!
На «Благословите»: «Избавителю всех…»
Избавителю всех, сильный Боже, хвалим и славим Тя, сподобивый нас достигнути святаго сего праздника и возвеселивый души и умы наша.
Радуйся, Столпе, ибо тела храниши от напастей, душевный же свет являеши купелию и миром, и мы непрестанно покланяемся тебе.
Радуйся, Столпе, ибо, яко молния, сияеши между небом и землею и любовию сопрягаеши и соединяеши небесная и земная.
На «Величите»: «Камень…»
Камень света, без рук повешенный на воздусе, невидимо стоит, и Ангели с человеки поют немолчно: слава Столпу, надежде нашей.
Жилище, доме святый славы Божия, о великое благолепие святыни твоея, ибо Столп с тобою веселит нас, чад своих, и покрываете нас!
Столпе наш и свете, Мати Сына Божия, сосцами своими Иисуса Бога напитавшая, тако и Столпом миро и нам вкушати даеши.
На «Поим», глас 4-й плагальный: «Глубину Чермную…»
Боже, в Сионе Духа Святаго излиявый на апостолов и огнь, языки попаляющий, явивый на плевелы еретиков и капища идольская и премудрости исполнивый их, тако и мне накапи премудрость каплею огненною, да достойно украсим праздник пением Божественным.
Радуйся, престоле, небу подражающий, ибо Сын Божий радость тебе уготовляет, просвещающую днесь весь мир, ибо Святому Столпу Ангели невидимо, се, зде посреде нас стояще, с нами поют непрестанно.
Троице Святая, в трех Ипостасех познаваемая, Едино Божество и Едине, Отче, Сына Родителю, Сыне, от Него рожденный, Душе исходящий, купно покланяемый, премудростию управляющий, Вино всех светов, спаси создания Твоя, с верою уповающия.
Мати и Дево, Сына Божия носившая, палато златая пространная, чудно небесам невместимаго во утробе вместившая, Столпе, свете Света, светов Владыки, неописаннаго описание бывшая, соединившая нас ходатайством, покрый нас от напастей.
На «Утвердися»: «Утверждаяй…»
Сей башне блаженной, носящей сокровище безмездное и безценное, — ибо от единаго оного единственнаго дается, иже есть бисер, в Евангелии написанный.
Сию башню блаженную, объемлющую сокровище, созерцаем, да обогатит нас, нищих; она же с надеждою проповедует нам дарование богатства безсмертия.
Безначальнаго Отца, Сына — начало имущаго плотию, а не Божеством, Духа исходящаго — Триипостаснаго во едино Божество славим, покланяемся Святей Троице.
Пророцы святии, иже духовным оком прежде зрясте и глаголасте: се, Столп святый света имамы — Матерь Божию, Деву Пречистую, небес высшую.
На «Услышах»: «Услышах, Господи…»
Блаженная оная жена, апостолов сопричастница, святая Нино, странное зрелище узре — Столп, невидимою рукою носимый.
Нектар обильных слез, яко насос, крепко низведе Столп, на воздух вознесенный, и посреде нас пребывает во веки.
Хитон сияет, Столп светит, Крест блистает и лучи, яко молния, испущает, Церковь же вопиет: царие и людие, радуйтеся днесь! Столпа Изобразителю, светов Владыко и Создателю, просвети душу и сердце наше, Троице Боже, Едино Божество.
Столпу, утверждению нашему, похвале всего мира, Пресвятой Богородице, поклонимся, упованию нашему.
На «От нощи»: «Да не когда…»
Радуйся, Столпе Животворящий, сиянием Божественным просвещенный, иже в престоле и посреде нас светло гориши, яко огнь, яко пламень неугасимый, и светиши душе и уму нашему.
Егда у капища идольскаго отроцы закалаеми бяху, Самаил веселяшеся; ныне же, егда пред Столпом из купели отроцы просвещаются, сатана рыдает, Ангели же радуются, и мы Христа прославим и поклонимся Ему.
Пелене света, под Столпом света в покров лежащему Хитону Избавителя, над нимже Столп, яко огнь, возгорается и Ангели непрестанно поют, — да величаем и восхвалим во веки.
Един от Троицы, Отроча новое, прежде век Бог неописанный, облекшую светлое тело Его ризу, Хитон света, в надежду нам дарова, емуже со страхом покланяемся.
О светов Начальниче, от Света Отча без матере рожденный и от Столпа света, Девы, без отца рожденный, Иисусе, свет изливаяй на души наша, просвети омраченных сих.
На «Возопи»: «Остави…»
Егда у капища Армазскаго кровь отроков младенцев курилася, Самаилом сладко обоняема бяше, окаянныя же души их вкушаху смрад адов.
Нектару слез блаженныя Нино Столп покорися, и, возлетевший, паки возвратився к нам, с веселием присно питает.
Над светлою пеленою Сына твоего, Хитоном, Столп света, яко огнь, яко молния, возгорается, Богородице Дево: царя вернаго светом просвети.
Жен славо, дев же похвало, Столпе просвещенный, иже возводиши нас на небо к Сыну твоему, Мати Божия, помилуй восхваляющих тя.
На «Благословен»: «Отроцы еврейстии…»
Отроцы еврейстии, бежащии от фараона царя, в пустыни столпом огненным безпогрешно шествоваху и глаголаху: благословен еси.
Отроцы у жертвенника Армазскаго закалаеми бяху, ныне же пред Столпом света просвещаются и вопиют: благословен еси.
Отроцы еврейстии, егда идяху пред Христом, Единым от Троицы, ваиами восхваляху и глаголаху: благословен еси.
Отроцы, чада Соборныя Церкве, светом запечатленнии, Столпу светлому, Матери Божией, воспоим и рцем: благословен еси, Господи, от Девы рожденный.
На «Благословите»: «Седмерицею…»
Небу подражающая сия Церковь и Столп Животворящий осеняют облаками света одеяние света, пелену огненную, Хитон всесвятый, и бывают телом ангельскому воинству, радостно поющему: благословим и поклонимся Христу Богу, вся премудро устрояющему.
О жена смиренная, до небес вознесенная, блаженная Нино, апостолов сопричастница, прилете, яко стрела молнии светлыя, капища попаляющи и бесов уязвляющи, нам же, верным, в души и умы Столп света проливающи.
Три вещи трех образов, Троицу изображающия, — Церковь, Хитон и Столп Животворящий — купно прославим, якоже Троицу во едино Божество исповедуем, трисветлое единство: Отца, Сына, Духа, нераздельно и неслитно, чающе будущия жизни.
Радуйся, стамно златая, манны исполненная, и паки радуйся, купеле света, мира исполненная, обезсмерчивающая человеки;
радуйся, кадильнице, благоухания исполненная, дающая нам обоняти древа райская;
радуйся, Мати Сына Божия.
На «Величите»: «Ужасеся о сем небо…»
О Столпе, яко огнь горящий светом неоскудным и незаходимым, иже светиши в души и сердца верных, и сияния и лучи света твоего достигают концев земли, иже славою твоею исполняется вся земля!
Святому ковчегу, свет объемлющему, яко столп возвышенному, в немже присно горит свет Божественный, и Хитону, свет Божественный объемлющему, свыше призирающему, воспоим, восхвалим и поклонимся, да души наша просветит.
О Солнце славы, Иисусе, сие сияние чудес, еже собрал еси во спасение нам, и сокровищем некрадомым сокрыл еси нам, и в залог безпредельнаго онаго будущаго Царствия дал еси нам, — слава благости Твоей.
Покров света, покров наш — святый Хитон и Столп Животворящий, взаимным соседством украшенные, и жилище и престол Божий, небом распростертый, сугубыми светы величаво седящий высокий, небесем равный: о сладкое соседство единообитающих!
О Троице, Едино Божество, Твоя есть премудрость и смотрение сие безпредельное и непостижимое человеком; Ты едина явила еси вещи сия света во спасение нам: Отче нерожденный, Сыне рожденный, Душе исходящий, Едино Божество.
Столпу и утверждению мира, стамне златой, манны исполненной, дающей нам вкусити благоухание, престолу Бога Вышняго, и ковчегу златому, святому светильнику горящему, купели света, Матери Христовой поклонимся.
Троицу изображающим, трисветлым сокровищам, жилищу Божию — телу Церкве, Хитону Божию и Столпу Животворящему, светом и светилам мира, — воспоим, прославим и поклонимся.
Днесь Божественный и святый Хитон светит и украшает Церковь Божию, и Столп святый и Животворящий блистает, яко молния, и испущает благоухание, еже верою обоняем, и миро, источник безсмертия, вкушаем, покланяющиися Святей Троице.
На «Хвалите». Слава: «Днесь Христос…»
Днесь Христос, Сын Божий, пресветлую и блаженную радость дивную уготовляет Невесте Своей Церкви, яже во утробе своей, яко святый светильник, имать Столп Животворящий, и блистает, яко молния, и светит всему миру, и концы земли веселит; и мы, чада Церкве, с силами небесными вопием и глаголем: молитвами святыя Богородицы и Столпа Животворящаго, Боже, спаси нас.
