Песнопения Страстной седмицы
Грядый Господь к вольной страсти, апостолом Своим глаголаше на пути: се, восходим во Иерусалим, и предастся лестию Сын Человеческий, якоже есть писано о Нем. Приидите убо и мы, очищенными смыслы, сшествуим Ему, и сраспнемся, и умрем с Ним, и услышим вопиюща Его: не ктому в земный сей Иерусалим за еже страдати, но восхожду ко Отцу Моему и Отцу вашему, и Богу Моему и Богу вашему, и совозвышу вас в горний Иерусалим, во Царство Небесное.
Час исхода помышляй, о душе моя, ужаснися посечения смоковницы и данный тебе талант умножи трудом и любовию, окаянная; бодрствуй и умиленно вопий: Христе Многомилостиве, не отвержи мене от чертога Твоего.
Сон нерадения обладает упорством душею моею, Благий, и светильника, добродетельми возжженнаго, не имам, ибо уподобихся юродивым девам и время делания в лености иждих; не затвори мне, Владыко, недр милосердия, но избави мя от горькаго сна и возбуди, и введи мя с мудрыми девами в чертог Твой, идеже чистый глас празднующих непрестанно вопиет: Господи, слава Тебе.
Паче блудницы, Благий, беззаконновав, слез потоков никакоже Тебе принесох, но молчанием молящися, припадаю Ти, с любовию облобызая пречистыя Твоя нозе, да, яко Владыка, оставление подаси ми, зовущему Ти долгов, Спасе: от скверны дел моих избави мя.
Простре блудница власы Тебе Владыце, простре Иуда руце беззаконным: ова убо прияти оставление, а сей взяти сребреники. Темже Тебе вопием, проданному и свобождшему нас: Господи, слава Тебе.
Егда славнии ученицы на умовении вечери просвещахуся, тогда Иуда злочестивый сребролюбием недуговав омрачашеся и беззаконным судиям Тебе, праведнаго Судию, предаяше. Виждь, о вернии, имений рачителя, сих ради удавление употребивша! Бежим несытыя болезни, яже на Учителя своего таковая дерзну. Иже о всех премудро промышляяй, Человеколюбче, слава Тебе.
Бездна последняя греховная обыде мя, и волнения не терплю; но, яко Иона, Владыко, вопию Ти: возведи мя от тления.
Образ твой коварства исполнен, беззаконне Иудо: сребролюбием бо недугуя, стяжал еси человеконенавидение; и аще богатство любил еси, почто учился еси Учителю нищеты? И аще лобызаеши, почто продавал еси Всебезценнаго и предал еси Его на скверное убиение? Ужаснися, солнце, возстени, земле, и, сокрушенна, возопий: Безмерный Боже, слава Тебе.
Никтоже, о вернии, недостоин Божественныя вечери, никтоже, якоже Иуда, лестию да приступает к трапезе: той бо, хлеб прием, на Хлеб воздвиже пяту, видом убо ученик, делом же кровопийца убийца, со иудеи радуяся, со апостолы же водворяяся; ненавидяй лобызает, лобызаяй продает искупившаго нас от рабства, Бога и Спаса душ наших.
Собирается ныне сонм иудейский, да предаст Пилату Творца и Создателя всех. О беззаконницы, о неверных! Ибо Грядущаго судити живым и мертвым на суд предают, Исцелившаго страсти наша на страсть предают. Господи Долготерпеливе, велия Твоя милость, слава Тебе.
Агнец, егоже проповеда Исаия, се, грядет на заклание волею Своею, и хребет Свой святый дает на раны, и ланиты Божественныя на заушения, и лица Своего владычняго и зиждительнаго не отвращает от срамоты заплеваний, и безсудную поносную смерть нас ради приемлет безгрешный Бог волею Своею, да всем подаст милость, и воскресит нас из мертвых, и спасет нас.
Днесь Иуда оставляет Учителя благаго и приемлет диавола, ослепляется страстию сребролюбия и отпадает от Света омраченный: како бо можаше зрети, Светило безценное продавый лестию за тридесять сребреник? Но нам возсия пострадавый за весь мир; к Немуже возопиим: распныйся Милостиве, Человеколюбче Господи, слава Тебе.
Одеяйся светом, яко ризою, наг на суде стояше и в ланиту ударение прият от рук, яже созда; и людие беззаконнии на Кресте пригвоздиша днесь Бога славы: тогда завеса церковная раздрася, и камение распадеся, земля трепеташе, и день помрачися, не терпя зрети Бога досаждаема, Егоже трепещут вся; Тому поклонимся.
Сице глаголал еси, Господи, иудеем: людие Мои, что сотворих вам, или чим вам стужих? Слепцы ваша просветих, прокаженныя очистих и разслабленнаго, на одре лежаща, возставих. За манну желчь Мне подаете, за воду оцет, за любовь на Кресте Мя пригвождаете; ныне призову языки, и тии Мя прославят со Отцем и Святым Духом, и Аз им дарую живот вечный.
Сонм иудейский испроси у Пилата распятие Твое, Господи, ибо вины в Тебе не обретоша; повиннаго же Варавву испросиша, Тебе же, Праведнаго, повинна сотвориша и греха убийства наследницы быша. Но даждь им, Господи, воздаяние нечестия их, яко суетная умыслиша на Тя, нас же помилуй, славящих Тя.
Днесь висит на древе, Иже на водах землю повесивый; венцем от терния облагается, Иже ангелов Царь; в ложную багряницу облачается, одеваяй небо облаки; заушение приемлет волею, Иже во Иордане свободивый Адама; гвоздьми пригвождается Жених Церковный; копием прободается Сын Девы. Покланяемся страстем Твоим, Христе; покланяемся страстем Твоим, Христе; покланяемся страстем Твоим, Христе: покажи нам и славное Твое Воскресение.
Искупил ны еси от клятвы законныя честною Твоею Кровию, на Кресте пригвоздився, Благий, и копием прободся, и безсмертие источил еси человеком, Спасе и Избавителю, долготерпеливе Господи, слава Тебе.
Древом Адам прельщенный рая бысть изселен, древом же крестным разбойник в рай вселися: ов бо заповедь Сотворшаго его отверже, сей же, сраспинаемый Тебе, вопияше исповеданием: помяни мя, Спасе, во Царствии Твоем.
Распинаему Тебе, Христе, тварь ужасеся, земля поколебася со основании, и камение распадеся, светила померкоша, и завеса церковная раздрася, горы трепетом одержими бяху, и день в нощь преложися; мы же с разбойником глаголем: помяни мя, Спасе, во Царствии Твоем.
Страха ради иудейскаго возлюбленный друг Твой Петр отвержеся Тебе, Господи, и с плачем тако глаголаше: слез моих не премолчи, рекох бо сохранити заповедь Твою, Благий, и не сохраних; и наше покаяние тако приими, Боже, и помилуй нас.
Егда снят с древа Аримафей Спаса всех, яко мертва, смирною помаза и плащаницею обви, тогда совершися закон, уставленный мертвым тленным; и, трепетом объят, облобызаше Его и с радостию вопияше: слава снисхождению Твоему, Человеколюбче.
Егда положился еси во гробе, Спасе всех, ад ужасеся, и вереи врат его страхом сокрушишася, и гробы отверзошася, и мертвии восташа от гробов; тогда Адам вопияше: слава долготерпению Твоему, Христе, непостижимый Божеством, иже милостию избавил еси мя, Человеколюбче.
Благообразный Иосиф, с древа снем пречистое Тело Твое, Христе, плащаницею чистою обвив и благовонными покрыв, во гробе новем положи.
Егда снизшел еси ко гробу, Животе Безсмертный, тогда ад ужаснул еси блистанием Божества Твоего; егда же и умершия от преисподних воскресил еси, тогда вся силы небесныя взываху: Жизнодавче Христе Боже, слава Тебе.
Не рыдай Мене, Мати, зрящи во гробе Сына, Егоже во чреве без семене зачала еси: востану бо и прославлюся, яко Бог, и вознесу со славою верою и любовию непрестанно Тя воспевающия.
Днесь содержит гроб Создателя, дланию содержащаго тварь, и покрывающаго небеса покрывает камень худый во гробе; спит Живот, и ад трепещет, и Адам от уз разрешается всецело. Слава Твоему смотрению, Избавителю, имже совершив вся, даровал еси нам, яко Бог, субботствование вечное — из мертвых Твое Воскресение, Господи, слава Тебе.
Страстию Твоею, Христе, от страстей свободихомся, и Воскресением Твоим от тления избавихомся: Господи, слава Тебе.
Да молчит всяка плоть человеча, и да стоит со страхом и трепетом, и ничтоже земное в себе да помышляет: се бо Царь царствующих и Господь господствующих приходит заклатися и датися в снедь верным; предходят же Сему лицы Ангельстии, многоочитии Херувими и шестокрилатии Серафими, лица закрывающе и с трепетом вопиюще песнь ангельскую: аллилуиа, аллилуиа, аллилуиа.
