Молитва преподобному отцу Серафиму Саровскому
О великий угодниче Божий, преподобне и богоносне отче наш Серафиме! Призри от горния славы на нас, смиренных и немощных, обремененных многими грехами, твоея помощи и утешения просящих, приникни к нам благосердием твоим и помози нам заповеди Христовы непорочно сохраняти, веру православную твердо держати, покаяние во гресех наших усердно Богу приносити и в благочестии преуспевати, да достойны будем молитв твоих, о нас ко Богу приносимых.
Ей, святче Божий, услыши нас, с верою и любовию молящихся тебе, и не презри нас, требующих твоего заступления: ныне и в час кончины нашея помози нам и огради молитвами твоими от нападения злобы диавольския, да не обладают нами противныя лукавыя духи, но да сподобимся ходатайством твоим наследовати Царство Небесное. На тя возлагаем упование наше, отче милостивый: буди нам наставник ко спасению, да твоим водительством достигнем невечерняго света Престола Пресвятыя Троицы, ему же поем и славим со всеми святыми достопоклоняемое имя Отца и Сына и Святаго Духа во веки веков. Аминь.
О предивный отче Серафиме, великий Саровский чудотворче, скорый послушниче всех, к тебе прибегающих! Во дни подвига твоего в мире никто от тебя тощ и неутешен не отошел, но всем в сладость было видение лица твоего и благоуветливый глас словес твоих; дар исцелений, прозрения, врачевания немощных душ обильно в тебе явился, всеблаженне. Когда же призвал тебя Господь к небесному упокоению, преподобне отче Серафиме, любви твоея не оставил ты от нас, но неисчетны чудеса твои и бесчисленны, как звезды небесные, преподобне отче, чудотворче Серафиме; с упованием вопием тебе: о тишайший и кротчайший угодниче Божий, дерзновенный ко Господу молитвенниче, к тебе припадая, помощи твоея просим: вознеси благодатную молитву твою о нас, грешных, ко Господу Вседержителю, да спасет души наша, да укрепит Отечество наше, да дарует нам всякое благо в жизни сей и лучшее для души нашей, да оградит от падений греховных и да дарует дар истинного покаяния, во еже беспреткновенно внити нам в вечное Царство Небесное, где нескончаем непреходящий свет славы Его, и нам со всеми святыми воспевати, чтити и поклонятися Пресвятой, Единосущной, Животворящей и Нераздельной Троице во веки веков. Аминь.
