Покаянные стихиры

От юности моея мнози борют мя нечистыя страсти; сего ради молю Тя: буди ми помощник и спаси мя, Блаже.

Господи Иисусе Христе, Сыне Божий, помилуй мя, грешнаго.

С небесными силами хвалим Тя, Отче, и глаголем: Святый Боже, помилуй нас; в церкви святых поем Тя, Христе, и глаголем: Святый Крепкий, помилуй нас; Утешителю, Духу Святому, сладким гласом воспеваем и глаголем: Святый Безсмертный, помилуй нас.

Славословное пение рабов Твоих приими, Господи, и презри согрешения наша, яко един Благ и Человеколюбец.

Моления сего поющих Тебе (имена) не отвратися, Владыко, но помилуй нас, Человеколюбче, и даруй сим, с верою просящим, прегрешений прощение.

Услыши мя, Господи, яко блага милость Твоя, по множеству щедрот Твоих призри на мя и помилуй мя.

Аще и никтоже согреши якоже аз, но помилуй мя, сладчайший Спасе, со страхом кающагося и с трепетом вопиюща: согреших Ти, милостив буди, о Многомилостиве.

Седяй на Херувимех, со слезами припадаю милости Твоей: помилуй мя.

Грехми оскверненнаго, уязвленнаго и осужденнаго и страстьми падшаго помилуй мя, милостивый Боже, и от грехов моих избави, яко Человеколюбец, да непрестанно в песнех величаю Тя.

Потопленнаго грехми моими возведи мя, Боже мой, и помилуй мя.

Ты веси явная и тайная моя, Господи; мне, безмерно согрешившему Тебе, милостив буди сладостию Твоею, Спасе, и даждь ми время покаяния во очищение прегрешений моих.

В страшный день Суда покрый мя, Блаже, и помилуй мя.

Блудницу словом оправдавый и прокаженнаго очистивый, Христе, и душу мою очисти, Владыко, от безобразия и мерзости греховныя и ризою светлою украси ю.

Ответа не имам и спасения отчаяхся, Господи, помилуй мя.

Господь близ есть, уразумей, о душе, воспряни и попецися, и не спи, и тепле вопий Богу: помилуй мя, Блаже, согрешшаго и спаси милостию Твоею.

Множество грехов моих многою милостию Твоею очисти, Господи, и помилуй мя.

Се, суд приближися, и отчаяхся, яко осуждения достойная сотворих. О праведный Судие Христе, не осуди мене, самоосужденнаго и посрамленнаго.

Господи, потщися и настави мя ко пристанищу воли Твоея и помилуй мя.

Яко Мати Божия, дерзновение имущая к Сыну Твоему, Богородице, с любовию поющих Тя избави от грехов лютых, и немощей, и искушений.

Богородицею грехом моим милость сотвори, Боже, и спаси мя.

Яко смоковницу безплодную, не посецы мене, Спасе, грешнаго, но и еще на многая времена даруй ми прощение и напой душу мою слезами покаяния, да принесу Тебе плод милости.

Прежде конца, душе моя, к покаянию потщися.

Душе моя окаянная, временное сие преходит, вечное же то непреходяще. Вижу судилище и Судию на престолах и трепещу от приговора. Ныне убо потщися обратиться к покаянию, душе моя, ибо и мука та непреходяща.

На страшном оном суде милостив ми буди, Господи, яко Человеколюбец.

На унылую и изнемогшую душу мою призри, Боже, и помилуй мя, во гресе житие мое иждивша. Яко блудница, припадаю Ти: приими мя, Спасе, и спаси мя.

Господи, грехи моя очисти и Духа Твоего Святаго во мне обнови, Человеколюбче.

Помилуй мя, Боже, помилуй мя, — о двух грехах Давид рыдаше, аз же о тмах грехов припадаю Ти; он слезами постелю свою омочаше, аз же ни капли единыя имам; сего ради, отчаявся, вопию: помилуй мя, Боже, по велицей милости Твоей.

Господи, услыши молитву мою и, яко Давида, помилуй мя и очисти грехи моя.

Страшный суд ждет мене, Господи, ибо аще и умолчу, дела моя обличают мя; но обрати мя заблуждшаго, Христе Боже, и спаси мя.

Боже Многомилостиве, ослаби согрешения наша и помилуй нас.

Покаяния не имам, ниже паки слез; сего ради молю Тя, Спасе, прежде смерти обрати и даруй покаяние, да избавлюся от мук.

Множеством грехов моих падох и молю Тя: помилуй мя, Боже.

Яко блудный сын, и аз приидох, Спасе: приими мя, припадающаго Тебе, яко единаго от наемник Твоих, и помилуй мя, Человеколюбче.

Господи, ведый согрешения моя и покаяния ожидаяй, помилуй мя.

Господи Вседержителю, Ты веси, коль сильны ко спасению слезы: Езекию бо от врат смертных возвел еси, и блудницу от безчисленных согрешений освободил еси, мытаря же паче фарисея оправдал еси; и молим Тя: и нас с ними очисти и помилуй нас.

Господи, оправдай мя, яко мытаря, очисти мя, яко блудницу, и помилуй мя, яко разбойника.

Беззаконие мое, Господи, не плотское, но немощен есмь душею; прелестию мира сего гонимый, прибегаю к Тебе, Врачу душ и Освятителю: помилуй и исцели мя.

Ведый всех тайная, от беззаконий моих избави мя и помилуй мя.

О душе окаянная, каков плач будет тогда, когда праведнии в Царство Небесное взыдут, ты же во огни вечнем за дела твоя осуждена будеши! Воздохни и восплачи, и припади ко Христу, Избавителю твоему, и отвергни беззаконие твое.

Прощение грехов и множество милостей даруй ми, Спасе, и помилуй мя.

Камо бежу, Господи, егда изречеши суд души моей и предаси мя в руце ангела лютаго? Тогда возрыдаю, и восплачу, и реку, яко Иов: почто не умрох тамо, во утробе матерней? Спасе Милостиве, яко Иову, обнови душу мою и помилуй мя.

Множество грехов имам и молю Тя, Христе: призри на мя и помилуй мя.

Мытаря и фарисея различие уразумей, душе моя: единаго убо возненавиди гордостный глас, другаго же подражай умиленной молитве и глаголи: Боже, милостив буди мне, грешному, и помилуй мя.

Не отними милости Твоея от мене, но даруй нам покаяние и прощение грехов.

Покаяние мое приими, яко блуднаго сына, Иисусе Христе, Боже мой, иже дни моя в нерадении иждих и Тебе, Избавителя, безумием прогневах.

Человеколюбче Спасе, вземляй грехи мира, помилуй нас.

Яко разбойник, вопию: помяни мя; яко мытарь, припадаю Ти: Боже, милостив буди мне, грешному; и, яко блуднаго, приими мя и вся грехи моя, милостивый Владыко, прости, да воспою бездну благости Твоея.

Яко мытарь и яко блудница, вопию и молю Тя: помилуй мя, Боже.

Припадем и восплачем горько, верные, прежде Суда оного, егда небеса прейдут, звезды спадут и земля вострепещет и поколеблется, да обрящем совершенную милость от Христа Господа.

Помяни мя, Спасе, грешнаго, егда приидеши во славе на землю, и помилуй мя, Боже мой и Избавителю, и спаси мя.

Плоть осквернил я лукаво, растлил душу и сердце скверными помыслами, все чувства мои уязвил, очи осквернил и уши окалял, словом осквернил язык, и все имею постыдным; посему, припадая, взываю к Тебе, Владыко Христе: согрешил, согрешил я пред Тобою, прости и спаси меня.

Ты еси упование согрешающих, и от Тебе источник жизни, Человеколюбче Господи, помилуй мя.

Многажды пение языком совершая, обретаюся умом грех содевающим: устами бо песни глаголах, душею же злая вкушах; но обое исцели, Христе Боже, покаянием и помилуй мя.

Господи, омый мя милостию Твоею и спаси мя.

Ведомая и неведомая дела моя Ты веси, Создателю мой, не осуди мене во время суда, егда приидеши судити тварь, Избавителю, но даруй ми прегрешений прощение.

Господи, отврати лице Твое от беззаконий моих и вся грехи моя очисти, молю Тя.

Терпение дивное показал Иов в нападении искушений и, яко столп, стоял непоколебимо; тому подражатель буди, душе, и в искушениях твоих не ослабевай и не изнемогай пред ополчениями бесов.

Избави мя от червия неусыпающаго и геенны покаянием и подвигом, Христе.

Богатство, еже дал ми еси, расточих, Христе, и, обнажившись благих, облекохся в злая дела тьмы: украси мя красотою и облецы мя в первую честь.

Трепещу от многих согрешений моих и со слезами вопию Ти: Едине Врачу, помилуй мя.

Во разбойники впадшему уподобихся аз, Господи всех, грехми моими падший и ими немилостиво обнаженный; но не отпусти мене без исцеления, ибо Ты не самарянин, но от нетленныя Марии изшел еси, Иисусе, Спасе наш: помилуй нас.

Грехи и беззакония моя прогневаша Тя, но, яко Человеколюбец, ослаби и помилуй мя.

Дондеже есть время взывати ко Господу и отверсты двери покаяния, рекох в молитве: согреших, Спасе, прости и не помяни беззаконий моих.

Вопием Тебе с молитвою мы, согрешившии: милости Твоея не отними от нас, Господи.

Херувими и Серафими, Власти, Архангели, Престоли, Господства, Силы, святии Ангели и Начала, предстоящии Святей Троице, испросите нам прощение грехов и благую жизнь, да сподобимся Царствия Небеснаго.

Тебе, Богу нашему, поем, веков Творцу, Емуже служат Ангели в вышних, и мы с ними вопием: Господи, слава Тебе.

Слезы даждь ми, Боже мой, яко иногда жене грешнице, и сподоби мя омочити нозе Твои, да избавиши мя от пути прелести, и принести Тебе миро благовонное — житие чистое и покаяние святое стяжанное, да услышу и аз вожделенный глас Твой: вера твоя спасе тя, иди в мире!

Даждь нам, Господи, мир Твой и избави нас от многих грехов наших; Душе Животворящий, помилуй нас.

Достойно есть яко воистину блажити Тя, Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.

Слава Отцу и Сыну и Святому Духу, и ныне и присно и во веки веков. Аминь.

Господи, помилуй. (Трижды)

Господи Иисусе Христе, Сыне Божий, молитв ради Пречистыя Твоея Матере, преподобных и богоносных отец наших и всех святых Твоих, помилуй нас. Аминь.