Молитвы святителя Иоанна Златоуста, читаемые утром и вечером

Господи, не лиши мене небесных Твоих благ.

Господи, избави мя вечных мук и огня геенскаго страшнаго.

Господи, аще согреших умом моим, или помышлением, или словом, помилуй и прости мя.

Господи, исторгни из мене всякое неведение, и забвение, и малодушие, и окаменелое нечувствие.

Господи, избави мя от всякаго искушения и от скорбей многих.

Господи, просвети сердце мое, помраченное всеми скверными и темными страстями.

Господи, аще яко человек согреших, Ты же, яко Бог щедрый, обогати милость Твою, ибо веси немощь души моея, Крепкий.

Господи, посли благодать Твою на мя, да прославлю святое имя Твое и восхвалю Тя, Преблагий, всегда непрестанно.

Господи, напиши мя, раба Твоего, в книзе животней и даруй ми конец благий.

Господи Боже мой, ничтоже благо сотворих пред Тобою, но по благодати Твоей сподоби мя всякому делу положити начало благое.

Господи, окропи в изсохшем сердце моем росу благодати Твоея и напой мя.

Господи Царю небесе и земли, помяни мя, нечистаго раба Твоего, во Царствии Твоем. Аминь.

Господи, в покаянии приими мя. Господи, не остави мене.

Господи, не введи мене в напасть и в злую и немилостивую беду не предаждь мя.

Господи, даждь ми мысль благу и благоугодну Тебе всегда.

Господи, даждь ми источники слез, и память смертную незабвенную, и умягчение сердца, да умилюся.

Господи, даждь ми помысл благ, да исповем грехи моя пред Тобою.

Господи, даждь ми смирение, послушание и незлобие, да хожду в правде Твоей.

Господи, даждь ми терпение, великодушие и мир душе моей.

Господи, всели в душу мою источник добродетелей и страх Твой в сердце моем распространи.

Господи, сподоби мя любити Тя от всея души моея и от всего помышления моего и творити во всем волю Твою.

Господи, покрый мя от человек злых, и бесов лукавых, и страстей скверных, и от всякия иныя неподобныя и неполезныя вещи.

Господи, вем, яко твориши, якоже волиши; да будет воля Твоя и во мне, грешнем, яко благословен еси ныне и присно и во веки. Аминь.