Андрей Критский
Ирмос: Помощник и Покровитель бысть мне во спасение, Сей мой Бог, и прославлю Его, Бог отца моего, и вознесу Его: славно бо прославися.
Помилуй мя, Боже, помилуй мя.
Каинову прешед убийству, произволением бых убийца совести души, оживив плоть и воевав на ню лукавыми моими деяньми.
Помилуй мя, Боже, помилуй мя.
Авелевей, Иисусе, не уподобихся правде, дара Тебе приятна не принесох когда, ни деяний божественных, ни жертвы чистыя, ни жития непорочнаго.
Помилуй мя, Боже, помилуй мя.
Яко Каин и мы, о душе окаянная, всех Создателю деяния скверная, и жертву порочную, и непотребное житие принесохом вкупе, темже и осудихомся.
Помилуй мя, Боже, помилуй мя.
Брение Здатель живописав, вложил еси во мне плоть и кости, и дыхание, и жизнь; но, о Творче мой, Избавителю мой и Судие, кающася приими мя.
Помилуй мя, Боже, помилуй мя.
Исповедую Тебе, Спасе, грехи, яже соделах, души и тела моего язвы, яже убийственнии внутрь разбойницы помысли возложиша на мя.
Помилуй мя, Боже, помилуй мя.
Аще и согреших, Спасе, но вем, яко Человеколюбец еси, наказуеши милостивно и милуеши тепле; зриши слезяща и течеши, яко Отец, призывая блуднаго.
Слава Отцу и Сыну и Святому Духу.
Пресущная Троице, во Единице покланяемая, возми бремя от мене тяжкое греховное и, яко благоутробна, даждь ми слезы умиления.
И ныне и присно и во веки веков. Аминь.
Богородице, надеждо всех поющих Тя, возми бремя от мене тяжкое греховное и, яко Человеколюбица, даждь ми слезы покаяния.
Ирмос: Вонми, небо, и возглаголю, и воспою Христа, от Девы плотию пришедшаго нас ради.
Помилуй мя, Боже, помилуй мя.
Срачицы кожаныя ушил ми есть грех мой, от Бога тканныя одежды обнажив мя.
Помилуй мя, Боже, помилуй мя.
Одеян есмь одеждею студа, яко листвием смоковным, во обличение моих самовластных страстей.
Помилуй мя, Боже, помилуй мя.
Одеяхся оскверненною ризою и окрававленною постыдно, течением страстнаго и сластолюбнаго жития.
Помилуй мя, Боже, помилуй мя.
Впадох в бездну страстей и в вещное растление, и оттуду ныне врагом посмеваем есмь.
Помилуй мя, Боже, помилуй мя.
Веществолюбное и сребролюбное житие паче невещественнаго возлюбих и отягчихся грехом.
Помилуй мя, Боже, помилуй мя.
Украсих плоти образ и многоразличными похотьми осквернихся, и осудихся.
Помилуй мя, Боже, помилуй мя.
О внешнем точию прилежно пекийся, внутреннюю небрегох Богообразную скинию.
Помилуй мя, Боже, помилуй мя.
Первообразную доброту образа погребох страстьми; но, Спасе, яко драхму взыщи мя.
Помилуй мя, Боже, помилуй мя.
Яко блудница, вопию: согреших, един согреших Тебе, и приими, яко миро, моя слезы.
Помилуй мя, Боже, помилуй мя.
Очисти мя, глаголю, яко мытарь, Спасе, очисти мя, никтоже бо от Адама якоже аз согреши Тебе.
Слава Отцу и Сыну и Святому Духу.
Троицу во Единице славлю, Бога всех: Отца, Сына и Святаго Духа.
И ныне и присно и во веки веков. Аминь.
Пречистая Владычице Дево, Всепетая, моли прилежно, да спасет нас.
Ирмос: Утверди, Господи, на камени заповедей Твоих подвигшееся сердце мое, яко Един Свят еси и Господь, Един сильный, праведный и святый.
Помилуй мя, Боже, помилуй мя.
Источник живота Тя стяжах, смерти Разрушителя, и зову Ти от сердца моего прежде конца: согреших, очисти и спаси мя.
Помилуй мя, Боже, помилуй мя.
Согреших, Господи, согреших Тебе, очисти мя; несть бо иже согреши в человецех, егоже не превзыдох прегрешеньми.
Помилуй мя, Боже, помилуй мя.
Во днех Ноевых, Спасе, блудствовавшим подражах, оных наследовах осуждение в потопе погружения.
Помилуй мя, Боже, помилуй мя.
Хама оного, душе, отцеубийцу подражавши, срама не покрыла еси искренняго, вспять зряще ступивши.
Помилуй мя, Боже, помилуй мя.
Яко Лот, бегай, душе моя, греха, бегай Содома и Гоморры, бегай пламене всякаго безсловеснаго желания.
Помилуй мя, Боже, помилуй мя.
Помилуй, Господи, помилуй мя, вопию Ти, егда приидеши со Ангелы Твоими воздати всем по достоянию деяний.
Слава Отцу и Сыну и Святому Духу.
Троице простая, несозданная, безначальное естество, в трех Лицах познаваемая, спаси нас, верою покланяющихся державе Твоей.
И ныне и присно и во веки веков. Аминь.
От Отца безлетна Сына в лето, Богородице, безмужно родила еси, странное чудо, пребывши Дева доящи.
Ирмос: Услыша пророк пришествие Твое, Господи, и убояся, яко хощеши от Девы родитися и человеком явитися, и глаголаше: услышах слух Твой и убояхся, слава силе Твоей, Господи.
Помилуй мя, Боже, помилуй мя.
Бодрствуй, о душе моя, подвизайся, яко великий в патриарсех, да стяжеши деяние с разумом, да будеши ум, зрящий Бога, и достигнеши в незаходимый мрак видения, и будеши великий купец.
Помилуй мя, Боже, помилуй мя.
Двенадесять патриархов великий в патриарсех детотворив, таинственно утверди тебе лествицу деятельнаго, душе моя, восхождения, дети, яко основания, степени, яко восхождения, премудренно подложив.
Помилуй мя, Боже, помилуй мя.
Исаву возненавиденному поревновавши, душе, отдала еси прельстителю твоему первыя доброты первенство, и отеческаго благословения отпала еси, и сугубо поползнулася еси, деянием и разумом; темже ныне покайся.
Помилуй мя, Боже, помилуй мя.
Едом Исав наречеся за крайнее женонеистовства смешение, невоздержанием бо всегда разжигаем и сластьми сквернимый, Едом именовася, еже глаголется разжжение души грехолюбивыя.
Помилуй мя, Боже, помилуй мя.
Иова на гноищи слышавши, о душе моя, оправдавшася, того мужеству не поревновала еси, твердаго не имела еси предложения во всех, яже видела еси, и испытала еси, но явилася еси нетерпелива.
Помилуй мя, Боже, помилуй мя.
Иже прежде на престоле, наг ныне на гноищи сидяше, многочадный и славный, безчаден и безвестен внезапу бысть: палату убо гноище, и бисер струпы вменяше.
Слава Отцу и Сыну и Святому Духу.
Нераздельно существом, неслитно лицы богословлю Тя, Троическое едино Божество, яко единоцарственное и сопрестольное, вопию Ти песнь великую, в вышних трегубо песнословимую.
И ныне и присно и во веки веков. Аминь.
И раждаеши, и девствуеши, и пребываеши обоюду естеством Дева; Рождейся обновляет законы естества, утроба же раждает нерождающая: Бог идеже хощет, побеждается естества чин, творит бо, елика хощет.
Ирмос: От нощи утренююща, Человеколюбче, просвети, молюся, и настави и мене на повеления Твоя, и научи мя, Спасе, творити волю Твою.
Помилуй мя, Боже, помилуй мя.
Ковчежца слышала еси, душе, Моисеова, водами, волнами носима речными, яко в чертозе древле бегающа деяния горькаго советования фараонова.
Помилуй мя, Боже, помилуй мя.
Бабы аще слышала еси, убивающия иногда младоумное, душе, мужеское деяние целомудрия, ныне, яко великий Моисей, премудростию насыщайся.
Помилуй мя, Боже, помилуй мя.
Якоже великий Моисей египтянина, уязвивши ум, душе окаянная, не убила еси; и како вселишися, глаголи, в пустыню страстей покаянием?
Помилуй мя, Боже, помилуй мя.
В пустынях вселися великий Моисей: гряди убо, подражай того житию, да и в купине богоявления, душе, в видении будеши.
Помилуй мя, Боже, помилуй мя.
Моисеов жезл вообрази, душе, ударяющ море и огустевающ глубину, во образ Креста Божественнаго, имже можеши и ты великая совершити.
Помилуй мя, Боже, помилуй мя.
Аарон приношаше огнь Богу непорочный, нелестный, но Офни и Финеес, яко ты, душе, приношаху чуждее Богу, оскверненное житие.
Слава Отцу и Сыну и Святому Духу.
Тя, Троице, славим, единаго Бога: Свят, Свят, Свят еси, Отче, Сыне и Душе, простое Существо, Единице присно покланяемая.
И ныне и присно и во веки веков. Аминь.
Из Тебе оболчеся в мое смешение Зиждитель, нетленная Дево и Мати, Иже сотворивый веки и соединивый Божество естеству человеческому.
Ирмос: Возопих всем сердцем моим к щедрому Богу, и услыша мя от ада преисподняго, и возведе от тли живот мой.
Помилуй мя, Боже, помилуй мя.
Волны, Спасе, грехов моих, яко в мори Чермнем возвращшася, покрыша мя внезапу, яко египтяны иногда и тристаты.
Помилуй мя, Боже, помилуй мя.
Неразумное, душе, произволение имела еси, яко прежде Израиль; Божественныя бо манны предсудила еси безсловесно страстей сластолюбие.
Помилуй мя, Боже, помилуй мя.
Кладенцы, душе, предпочла еси хананейских помышлений паче жилы камене, из негоже премудрости река, яко чаша, изливает струи богословия.
Помилуй мя, Боже, помилуй мя.
Свиная мяса и котлы, и египетское брашно паче небеснаго предпочла еси, душе моя, якоже древле неразумнии людие в пустыни.
Помилуй мя, Боже, помилуй мя.
Якоже жезлом ударил еси, Моисее, раб Твой, камень, образно животворящее ребро Твое преднаписа, из негоже вси пием, Спасе, питие жизни.
Помилуй мя, Боже, помилуй мя.
Испытай, душе, и смотри, яко Иисус Навин, земли обетования, какова есть, и вселися в ню благозаконием.
Слава Отцу и Сыну и Святому Духу.
Троица есмь проста, нераздельна, раздельна личне, и Единица есмь естеством соединена, Отец глаголет, и Сын, и Божественный Дух.
И ныне и присно и во веки веков. Аминь.
Утроба Твоя, Невесто, Бога нам роди, вообразившагося по нам: Егоже, яко Виновника всех, моли, Богородице, о спасении нашем.
Душе моя, душе моя, востани, что спиши? Конец приближается, и имаши смутитися. Воспряни убо, да пощадит тя Христос Бог, везде сый и вся исполняяй.
Ирмос: Согрешихом, беззаконновахом, неправдовахом пред Тобою, ниже соблюдохом, ниже сотворихом, якоже заповедал еси нам, но не предаждь нас до конца, отцев Боже.
Помилуй мя, Боже, помилуй мя.
Ковчег, егда ношаше на колеснице Оза, егда уклонися юнец, точию прикоснувся Божия искуси гнева; но того дерзости бегающи, душе, Божественная честно почитай.
Помилуй мя, Боже, помилуй мя.
Слышала еси Авессалома, како на естество возста, познала еси того скверная деяния, имиже оскверни ложе Давида отца; но ты подражала еси того страстная и сластолюбная стремления.
Помилуй мя, Боже, помилуй мя.
Порабощила еси непорабощенное твое достоинство, душе, телу твоему, иного бо Ахитофела обретши врага, душе, снизшла еси сего советом; но сия разсыпа Сам Христос, да ты всяко спасешися.
Помилуй мя, Боже, помилуй мя.
Соломон дивный и благодати премудрости исполненный, сей лукавое пред Богом сотворив иногда, отступи от Него, емуже ты окаянным твоим житием, душе, уподобилася еси.
Помилуй мя, Боже, помилуй мя.
Сластьми влеком своих страстей, оскверняшеся, увы мне, рачитель премудрости, рачитель блудных жен и чуждь от Бога; егоже ты подражала еси умом, о душе, сластьми скверными.
Помилуй мя, Боже, помилуй мя.
Ровоаму поревновала еси, не послушавшему совета отча, купно же и злейшему рабу Иеровоаму, прежнему отступнику, душе; но бегай подражания и зови Богу: согреших, ущедри мя.
Слава Отцу и Сыну и Святому Духу.
Проста сущи, нераздельная, единосущная, покланяемая, святыми славимая, Свет и Светы, Троица Святая, Бог Живот и Животы: прослави, душе, и Единому Божеству поработай.
И ныне и присно и во веки веков. Аминь.
Поем Тя, благословим Тя, покланяемся Ти, Богородительнице, яко Троицы нераздельныя породила еси Единаго Христа Бога, совершенна и истинна, и Ты нам отверзла еси сущим на земли небесная.
Ирмос: Егоже воинства небесная славят, и трепещут херувими и серафими, всяко дыхание и тварь, пойте, благословите и превозносите во вся веки.
Помилуй мя, Боже, помилуй мя.
Озии уподобившися, душе, сугубо имаши в себе и проказу его, навыком скверных дел и беззаконными деяньми: остави сия и возлюби покаяние.
Помилуй мя, Боже, помилуй мя.
Слышала еси ниневитян, припадших Богу во вретище и пепеле, душе, имже не подражала еси, но явилася еси злейшая всех, прежде закона и по законе согрешивших.
Помилуй мя, Боже, помилуй мя.
Во рве тины слышала еси, душе, Иеремию, граду Сиону рыдания творца и слез искателя: подражай плачевному житию его и спасешися.
Помилуй мя, Боже, помилуй мя.
Иона в Фарсис бежаше, провидев обращение ниневитян и милость Божию, ибо, как пророк, ведаше и подвизашеся, да не солжет прорицание его.
Помилуй мя, Боже, помилуй мя.
Даниила во рве слышала еси, како загради, душе, уста зверей, и веси, како отроцы, иже о Азарии, угасиша верою пламень пещи горящия.
Помилуй мя, Боже, помилуй мя.
Ветхаго Завета вся приведох тебе в образ, душе: подражай праведных боголюбезным деянием, избегни же паки лукавых грехов.
Слава Отцу и Сыну и Святому Духу.
Боже Отче, и Соприсносущный Сыне, и Утешителю Душе праве, Отче нерожденный, и Слове рожденный, Душе же исходящий, Троице во Единице, спаси мя.
И ныне и присно и во веки веков. Аминь.
Яко от червленицы, Пречистая, мысленная багряница Еммануилева внутрь во чреве Твоем плоть состкася; темже Богородицу воистину Тя почитаем.
Ирмос: Безсеменнаго зачатия рождество несказанное, Матере безмужныя нетленен плод, Божие бо рождение обновляет естества; темже Тя вси роди, яко Богоневестную Матерь, православно величаем.
Помилуй мя, Боже, помилуй мя.
Христос искушашеся, диавол искушаше, показуя камение, да хлебы будут; на гору возведе видети вся царствия мира во мгновении: убойся, о душе, лести, трезвися, молися на всякий час Богу.
Помилуй мя, Боже, помилуй мя.
Горлица пустынолюбная, глас вопиющаго возгласи, Христов светильник, проповедуяй покаяние, Ирод беззаконнова со Иродиадою; виждь, душе моя, да не увязнеши, но возлюби обращение.
Помилуй мя, Боже, помилуй мя.
В пустыню вселися благодати Предтеча, и Иудея вся и Самария, слышаще, течаху и исповедаху грехи своя, крещающеся; ихже ты, душе моя, никогдаже подражала еси.
Помилуй мя, Боже, помилуй мя.
Брак убо честен и ложе нескверно, обоя бо Христос прежде благослови, плотию ядый и в Кане же на браце воду в вино совершая, и показуя первое чудо, да ты изменишися, о душе.
Помилуй мя, Боже, помилуй мя.
Разслабленнаго укрепи, одр вземшаго, и юношу умершаго воздвиже, вдовицы сына и сотника; и самаряныни явися, в Духе служение тебе, душе, предживописа.
Помилуй мя, Боже, помилуй мя.
Кровоточивую исцели прикосновением края ризы, прокаженныя очисти, слепыя и хромыя просвети и исправи, глухия же и немыя, и низу слякшуюся исцели словом, да ты спасешися, окаянная душе.
Слава Отцу и Сыну и Святому Духу.
Отца прославим, Сына превознесем, Божественному Духу верно поклонимся, Троице нераздельней, Единице по существу, яко Свету и Светом, и Животу и Животворящему всех.
И ныне и присно и во веки веков. Аминь.
Град Твой сохраняй, нетленная Богородице, иже Тобою божественно царствует, Тобою имать силу и Тобою побеждает враги, превыше искушений бывает, ратники отражает и управляет подвластными своими.
Андрее треблаженне, отче, пастырю Критский, моли о нас, тепле тебе поющих, да избавимся гнева, скорби и тления и безчисленных грехов, с верою призывающии тя.
Первые шесть песней вторничного канона опираются на священную историю — до пророка Давида. Здесь продолжается тема первой песни понедельника — Адама и Евы — и переходит к Авелю и Каину: «Каину уподобихся убийце», и: «Авелевей не уподобихся правде, дара Тебе не принесох, ни деяний достойных, ни жертвы чистыя, ни жития непорочнаго» (вторник, песнь 1).
Кающийся человек видит подобие собственной души с развращенной душою эпохи Ноя, с бесстыдством Хама и стремится, подобно Лоту, бегать «всякого страстного движения» (вторник, песнь 3).
Здесь же является образ Авраама, узревшего Бога умом. Из его сынов один возвеличился, сам стал патриархом и дал потомству двенадцать патриархов: это был Иаков. Другой же — Исав — продал «первородства доброты» и отпал «отеческой славы» (вторник, песнь 4). Исав — образ человека, порабощенного похоти, а упоминаемый затем Иов — тот, кто познал полную суету плотского богатства и цену любви Божией; именно мужество Иова стяжает душе Царство.
Душа должна умертвить плотские помышления, как Моисей убил египтянина, и после этого покаянием одолеть пустыню страстей. Именно подражание Моисею необходимо, чтобы душа сподобилась «в купине богоявления видения» (вторник, песнь 5). Удар того же Моисея жезлом о камень и источение питьевой воды «прообразили животворящее святое ребро Твое» (Христово) (вторник, песнь 6).
Подготовила Тинатин Гогичаишвили, газета «Вестник Патриархии», № 8, 2006 г.
