Андрей Критский
Ирмос: Помощник и Покровитель бысть мне во спасение, Сей мой Бог, и прославлю Его, Бог отца моего, и вознесу Его: славно бо прославися.
Помилуй мя, Боже, помилуй мя.
От юности, Христе, заповеди Твоя преступих, всестрастно, нерадиво, уныло житие преидох, темже вопию Ти, Спасе: поне при конце спаси мя.
Помилуй мя, Боже, помилуй мя.
Поверженна мя, Спасе, пред враты Твоими, аще и на старость, не отрини мене во ад тща, но прежде конца, яко Человеколюбец, даждь ми прегрешений оставление.
Помилуй мя, Боже, помилуй мя.
Богатство мое, Спасе, изнурив в блуде, пуст есмь плодов благочестивых, алчен же зову: Отче щедрот, предварив, Ты ущедри мя.
Помилуй мя, Боже, помилуй мя.
В разбойники впадый аз есмь помыслы моими, весь от них уязвихся ныне, исполнихся ран, но Сам мя, Христе Спасе, исцели.
Помилуй мя, Боже, помилуй мя.
Священник мя предвидев, мимо иде, и левит, видев в лютых, презре нага; но, о из Марии возсиявый Иисусе, Ты представ ущедри мя.
Преподобная мати Марие, моли Бога о нас.
Подаждь ми светлую благодать от Божественнаго свыше Промысла, избежати страстей омрачения и воспети тепле Твоего, Марие, жития красная исправления.
Слава Отцу и Сыну и Святому Духу.
Пресущная Троице, во Единице покланяемая, возми бремя от мене тяжкое греховное и, яко благоутробна, даждь ми слезы умиления.
И ныне и присно и во веки веков. Аминь.
Богородице, надеждо всех поющих Тя, возми бремя от мене тяжкое греховное и, яко Человеколюбица, даждь ми слезы покаяния.
Ирмос: Вонми, небо, и возглаголю, и воспою Христа, от Девы плотию пришедшаго нас ради.
Помилуй мя, Боже, помилуй мя.
Уязвихся, как Давид, блудом и осквернихся, но омый и мене, Спасе, слезами.
Помилуй мя, Боже, помилуй мя.
Ни слез, ни покаяния имам, ни умиления: Сам ми сия, Спасе, яко Бог, даруй.
Помилуй мя, Боже, помилуй мя.
Погубих первозданную доброту и благолепие мое, и ныне лежу наг и срамлюся.
Помилуй мя, Боже, помилуй мя.
Двери Твоея да не затвориши мне тогда, Господи, Господи, но отверзи ю мне кающемуся Тебе.
Помилуй мя, Боже, помилуй мя.
Внуши стенания души моея и очию моею приими капли, Спасе, и спаси мя.
Слава Отцу и Сыну и Святому Духу.
Человеколюбче, хотяй всем спастися, Ты воззови мя и приими, яко благ, кающагося.
И ныне и присно и во веки веков. Аминь.
Пречистая Владычице Дево, Всепетая, моли прилежно, да спасет нас.
Ирмос: Видите, видите, яко Аз есмь Бог, манну одождивый и воду из камене источивый древле в пустыни людем Моим, десницею единою и крепостию Моею.
Помилуй мя, Боже, помилуй мя.
Видите, видите, яко Аз есмь Бог: услыши, душе моя, Господа вопиюща, и бегай первыя греха и бойся, яко Судии и Бога.
Помилуй мя, Боже, помилуй мя.
Кому уподобилася еси, многогрешная душе, точию первому Каину и Ламеху оному, каменем убивши тело злодействы и умертвивши ум безсловесными стремленьми.
Помилуй мя, Боже, помилуй мя.
Вся прежде закона приведши, о душе, Сифу не уподобилася еси, ни Еноса подражала еси, ни Еноха преложением, ни Ноя, но явилася еси убога праведных жизни.
Помилуй мя, Боже, помилуй мя.
Едина отверзла еси хляби гнева Бога твоего, душе моя, и потопила еси, яко землю, всю плоть и деяния, и житие, и пребыла еси вне спасительнаго ковчега.
Преподобная мати Марие, моли Бога о нас.
Всем сердцем и любовию припади ко Христу и пути первых грехов возвратися, и в пустынях непроходимых воспитайся, и тамо Божественныя заповеди чисто исполни.
Слава Отцу и Сыну и Святому Духу.
Безначальная, несозданная Троице, нераздельная Единице, кающагося мя приими, согрешшаго спаси, Твое есмь создание, не презри, но пощади и избави мя огненнаго осуждения.
И ныне и присно и во веки веков. Аминь.
Пречистая Богородице, надеждо к Тебе притекающих и пристанище обуреваемых, милостиваго и Творца и Сына Твоего умилостиви и мне молитвами Твоими.
Ирмос: Утверди, Господи, на камени заповедей Твоих подвигшееся сердце мое, яко Един Свят еси и Господь, Един сильный, праведный и святый.
Помилуй мя, Боже, помилуй мя.
Симова, душе окаянная, благословения не наследовала еси, ни Иафету, якоже, пространнаго одержания в земли оставления обрела еси.
Помилуй мя, Боже, помилуй мя.
От земли Харран изыди от греха, душе моя, иди в землю, точащую присноживотное нетление, еюже Авраам наследова.
Помилуй мя, Боже, помилуй мя.
Слышала еси, душе моя, Авраама, оставльшаго древле землю отечества, и бывша пришельца; сего произволению подражай.
Помилуй мя, Боже, помилуй мя.
У дуба Мамврийскаго учредив патриарх Ангелы, наследова по старости обетования ловитву.
Помилуй мя, Боже, помилуй мя.
Исаака, окаянная душе моя, разумевши новую жертву тайно всесожженну Господеви, подражай его произволению.
Помилуй мя, Боже, помилуй мя.
Измаила слышала еси, изгнанна яко рабынино рождение, душе моя; трезвися, зри, да не таково что пострадаеши, похотствующи.
Преподобная мати Марие, моли Бога о нас.
Обдержим есмь бурею и треволнением прегрешений; но Сама мя, мати, ныне спаси и ко пристанищу Божественнаго покаяния возведи.
Преподобная мати Марие, моли Бога о нас.
Рабское моление и ныне, преподобная, принесши ко умилостивой Богородице твоими мольбами, отверзи ми Божественныя входы.
Слава Отцу и Сыну и Святому Духу.
Троице простая, несозданная, безначальное естество, в трех Лицах познаваемая, спаси нас, верою покланяющихся державе Твоей.
И ныне и присно и во веки веков. Аминь.
От Отца безлетна Сына в лето, Богородице, безмужно родила еси, странное чудо, пребывши Дева доящи.
Ирмос: Услыша пророк пришествие Твое, Господи, и убояся, яко хощеши от Девы родитися и человеком явитися, и глаголаше: услышах слух Твой и убояхся, слава силе Твоей, Господи.
Помилуй мя, Боже, помилуй мя.
Оскверних тело, осквернило дух, и вся струпами исполнен есмь; но яко врач, Христе, обоя мне покаянием исцели, омый, очисти, покажи, Спасе мой, снега чистейша.
Помилуй мя, Боже, помилуй мя.
Тело Твое и кровь, распинаемь, о всех положил еси, Слове: тело убо, да воссозиждеши мя; кровь же, да омыеши мя; дух предал еси, да мя приведеши, Христе, Твоему Родителю.
Помилуй мя, Боже, помилуй мя.
Соделал еси спасение посреде земли, Щедре, да спасемся; волею на древе распялся еси, Едем затворенный отверзеся, вышняя и нижняя тварь Тебе покланяется, языцы вси спасени.
Помилуй мя, Боже, помилуй мя.
Да будет ми купель кровь из ребр Твоих, вкупе и питие, источившее воду оставления, да обоюду очищаюся, мазуя и пия, яко помазание и питие, Слове, животочная Твоя словеса.
Помилуй мя, Боже, помилуй мя.
Чашу Церковь стяжа, ребро Твое живоносное, из негоже сугубыя нам источи струи оставления и разума, во образ древняго и новаго, двоих вкупе Заветов, Спасе наш.
Помилуй мя, Боже, помилуй мя.
Наг есмь чертога, наг есмь и брака, купно и вечери; светильник угасе яко безелейный, чертог затворися мне спящу, вечеря снедеся, аз же по руку и ногу связан вон отвержен есмь.
Слава Отцу и Сыну и Святому Духу.
Нераздельно существом, неслитно лицы богословлю Тя, Троическое едино Божество, яко единоцарственное и сопрестольное, вопию Ти песнь великую, в вышних трегубо песнословимую.
И ныне и присно и во веки веков. Аминь.
И раждаеши, и девствуеши, и пребываеши обоюду естеством Дева; Рождейся обновляет законы естества, утроба же раждает нерождающая: Бог идеже хощет, побеждается естества чин, творит бо, елика хощет.
Ирмос: От нощи утренююща, Человеколюбче, просвети, молюся, и настави и мене на повеления Твоя, и научи мя, Спасе, творити волю Твою.
Помилуй мя, Боже, помилуй мя.
Ожесточихся умом, как фараон, Владыко, Ианнием и Иамврием душою и телом, и погрузих ум; но помози ми вскоре.
Помилуй мя, Боже, помилуй мя.
Смесихся, окаянный, умом с веществом, очисти мя, Владыко, банею моих слез, молю Тя, плоти моея вещество убели, яко снег.
Помилуй мя, Боже, помилуй мя.
Аще испытаю моя дела, Спасе, всякаго человека превзошедша себе вижу грехом, яко разумом разумеваяй согреших, не неведением; но помилуй мя.
Помилуй мя, Боже, помилуй мя.
Пощади, Господи, пощади создание Твое, согреших, ослаби ми, яко естеством чист сый Един Ты, и ин разве Тебе никтоже есть кроме скверны.
Помилуй мя, Боже, помилуй мя.
Мене ради Бог сый, вообразился еси в мя, показал еси чудеса, исцеливый прокаженныя и разслабленнаго стягнувый, кровоточивыя ток уставил еси, Спасе, прикосновением риз.
Преподобная мати Марие, моли Бога о нас.
Сладости плотския оставивши, преподобная, прешла еси реку Иорданскую и обрела еси покой непорочный; сего и нас сподоби ныне молитвами твоими.
Слава Отцу и Сыну и Святому Духу.
Тя, Троице, славим, единаго Бога: Свят, Свят, Свят еси, Отче, Сыне и Душе, простое Существо, Единице присно покланяемая.
И ныне и присно и во веки веков. Аминь.
Из Тебе оболчеся в мое смешение Зиждитель, нетленная Дево и Мати, Иже сотворивый веки и соединивый Божество естеству человеческому.
Ирмос: Возопих всем сердцем моим к щедрому Богу, и услыша мя от ада преисподняго, и возведе от тли живот мой.
Помилуй мя, Боже, помилуй мя.
Ополчися и побори плотския страсти, как Иисус Амалика, и Гаваониты, лестные помыслы, всегда побеждающи.
Помилуй мя, Боже, помилуй мя.
Пройди времене преходящее естество, яко прежде ковчег, и земли оныя буди во одержании обетования, душе, Бог повелевает.
Помилуй мя, Боже, помилуй мя.
Яко спасл еси Петра возопивша, спаси, предварив, мя, Спасе, от зверя избави мя, простри Твою руку и возведи из глубины греха.
Помилуй мя, Боже, помилуй мя.
Пристанище Тя вем тихое, Владыко, Владыко Христе, но от незаходимых глубин греха и отчаяния мя, предварив, избави.
Слава Отцу и Сыну и Святому Духу.
Троица есмь проста, нераздельна, раздельна личне, и Единица есмь естеством соединена, Отец глаголет, и Сын, и Божественный Дух.
И ныне и присно и во веки веков. Аминь.
Утроба Твоя, Невесто, Бога нам роди, вообразившагося по нам: Егоже, яко Виновника всех, моли, Богородице, о спасении нашем.
Душе моя, душе моя, востани, что спиши? Конец приближается, и имаши смутитися. Воспряни убо, да пощадит тя Христос Бог, везде сый и вся исполняяй.
Ирмос: Согрешихом, беззаконновахом, неправдовахом пред Тобою, ниже соблюдохом, ниже сотворихом, якоже заповедал еси нам, но не предаждь нас до конца, отцев Боже.
Помилуй мя, Боже, помилуй мя.
Манассиина собрала еси согрешения произволением, поставльши, яко мерзости, страсти и умноживши, душе, негодования; но того покаянию ревностно подражай и исповеданию.
Помилуй мя, Боже, помилуй мя.
Ахаавовым поревновала еси скверностем, душе моя, увы мне! Была еси плотских скверн жилище и сосуд срамный страстей; но из глубины твоея воздохни и глаголи Богу грехи твоя.
Помилуй мя, Боже, помилуй мя.
Небо заключися тебе, душе, и глад Божий постиже тя, якоже Ахаава непокорива иногда Илиею Фесвитянином; но вдовице Сарептской уподобися, препитай пророка душу.
Помилуй мя, Боже, помилуй мя.
Изби Илия иногда вращенныя пророки Иезавелины, в обличение Ахаавово; но ты, душе, сего убегай и укрепляйся верою.
Слава Отцу и Сыну и Святому Духу.
Проста сущи, нераздельная, единосущная, покланяемая, святыми славимая, Свет и Светы, Троица Святая, Бог Живот и Животы: прослави, душе, и Единому Божеству поработай.
И ныне и присно и во веки веков. Аминь.
Поем Тя, покланяемся Тебе и благословим Тя, Богородице, яко Единаго от Святыя Троицы родила еси, Христа Бога, совершенна и истинна, и Ты отверзла еси нам, сущим на земли, входы небесныя.
Ирмос: Егоже воинства небесная славят, и трепещут херувими и серафими, всяко дыхание и тварь, пойте, благословите и превозносите во вся веки.
Помилуй мя, Боже, помилуй мя.
Праведный Судие Иисусе, помилуй мя и избави мя огня осуждения, которым праведно ожидает меня казнь, и очисти мя прежде смерти покаянием.
Помилуй мя, Боже, помилуй мя.
Яко разбойник, вопию Ти: помяни мя; яко Петр, плачу горько: ослаби ми, Спасе; зову, яко мытарь; слезю, яко блудница; приими мое рыдание, якоже иногда хананейское.
Помилуй мя, Боже, помилуй мя.
Гноение исцели, Спасе, смиренныя моея души, Едине Врачу, пластырь мне наложи, и елей и вино — дела покаяния, умиление со слезами.
Помилуй мя, Боже, помилуй мя.
Хананею и аз подражая, помилуй мя, вопию, Сыне Давидов; касаюся края ризы, яко кровоточивая, плачу, яко Марфа и Мария над Лазарем.
Слава Отцу и Сыну и Святому Духу.
Боже Отче, и Соприсносущный Сыне, и Утешителю Душе праве, Отче нерожденный, и Слове рожденный, Душе же исходящий, Троице во Единице, спаси мя.
И ныне и присно и во веки веков. Аминь.
Яко от червленицы, Пречистая, мысленная багряница Еммануилева внутрь во чреве Твоем плоть состкася; темже Богородицу воистину Тя почитаем.
Ирмос: Безсеменнаго зачатия рождество несказанное, Матере безмужныя нетленен плод, Божие бо рождение обновляет естества; темже Тя вси роди, яко Богоневестную Матерь, православно величаем.
Помилуй мя, Боже, помилуй мя.
Нищим благовествоваше, больных исцеляше, от страстей страждущих избавляше Христос, с мытарями и грешниками ядяше, и Иаировы дщери душу изшедшую прикосновением руки возврати в тело.
Помилуй мя, Боже, помилуй мя.
Блудница освятися, мытарь оправдася, фарисей же гордостью осудися; ибо тот вопияше: спаси мя, сей: Боже, милостив буди мне; третий же хвалился: Боже, благодарю Тя, и прочая гордая словеса.
Помилуй мя, Боже, помилуй мя.
Мытарь бе Закхей, но спасеся; фарисей же Симон, трапезы учредитель, соблазнися; а блудница прият благодать прощения прегрешений от Имеющаго власть отпускати грехи; ее же обрести, душе, потщися.
Помилуй мя, Боже, помилуй мя.
Не поревновала еси, о окаянная душе моя, блуднице, яже приимши мира алавастр, со слезами мазаше нозе Спасове, отираше же власы, того древних согрешений рукописание раздирающаго ей.
Помилуй мя, Боже, помилуй мя.
Грады, имже даде Христос Евангелие, душе моя, уразумела еси, како прокляти быша; убойся примера, да не будеши, якоже оны, ихже Владыка Содомляном уподобив, до ада осуди.
Помилуй мя, Боже, помилуй мя.
Да не отчаяньми, о душе моя, побеждена будеши, хананеи веру слышавши, еяже дщи словом Божиим исцелися; Сыне Давидов, спаси и мене, возопий из глубины сердца, якоже она Христу.
Слава Отцу и Сыну и Святому Духу.
Отцу поклонимся, Сына превознесем и Духа праваго верою восхвалим, Троицу в Лицах и Единицу по существу, яко Свет и Светы, и Живот и Животы, животворящую всех.
И ныне и присно и во веки веков. Аминь.
Град Твой сохраняй, нетленная Богородице, иже Тобою божественно царствует, Тобою имать силу и Тобою побеждает враги, превыше искушений бывает, ратники отражает и управляет подвластными своими.
Андрее треблаженне, отче, пастырю Критский, моли о нас, тепле тебе поющих, да избавимся гнева, скорби и тления и безчисленных грехов, с верою призывающии тя.
Первые шесть песней среды снова развивают тему Пятикнижия Моисеева, хотя входят и образы Нового Завета, и вместе с тем вспоминается преподобная мать, возведенная из бездонной глубины греха на высочайшую ступень духовной лествицы, — святая Мария Египетская. Это вовсе не случайно. Преподобная Мария Египетская вселяет надежду спасения во всех, даже в самую униженную и отягченную грехом душу. Молитва к ней включается и в канон среды, и в канон четверга.
Грешная душа находит здесь сходство с Каином и с Ламехом, но зато совершенно отлучена от дел Сифа, Еноса, Ноя, оставшись вне ковчега завета. Потому она не могла получить благословения Сима и «ни пространных пределов, как Иафет, обрести в земле святой». Для этого она должна оставить Харран, подобно Аврааму, и, как он, искать землю обетования. Авраам у дуба Мамврийского посещением трех ангелов, то есть Бога, получил Божественную благодать, а Исаак стал прообразом жертвы Христовой. Все это — прообраз и одновременно живой пример избавления. Так же как изгнание Измаила, рожденного от рабыни, указывает на опасность (среда, песнь 3).
В среду в четвертой песни уже вспоминается распятие Христово; кровь и вода, истекшие из ребра Спасителя, — знамение прощения и спасения. Предстоящая пред Богом душа сознает, что «светильник угасе, яко безелейный, чертог затворися спящу» (то есть для дремлющих затворилась дверь Царства), а нераскаянная душа «вон отвержена» (среда, песнь 4).
В шестой песни снова появляются образы Нового Завета; здесь же вновь вспоминается ковчег завета как прообраз Церкви Христовой, а также Иисус Навин — победитель Амалика, злого врага.
Подготовила Тинатин Гогичаишвили, газета «Вестник Патриархии», № 8, 2006 г.
