წმინდა პროკოპი, ბიზანტიური ხატი

ხსენების დღე: 8 (21) ივლისი

წმინდა მოწამე პროკოპი ღვთისმოსავი მამისგან, ქრისტეფორესგან, დაიბადა, დედა კი, თეოდოსია, კერპთაყვანისმცემელი იყო. ქრისტეფორეს სიკვდილის შემდეგ დედამ ნეანია — ასე ერქვა წმინდანს მანამდე — სირიის ანტიოქიაში მყოფ დიოკლეტიანეს წარუდგინა. დიოკლეტიანემ ის ალექსანდრიის დუკად დანიშნა და იქ ქრისტიანთა დასასჯელად გაგზავნა. ალექსანდრიისკენ მიმავალს უფალი ესაუბრა და ეს ახალი მდევნელი თავის რწმენაზე მოაქცია. ნეანია სკვითოპოლისში დაბრუნდა და ქრისტეს ქადაგებდა. საკუთარმა დედამ გასცა, შეიპყრეს და პალესტინის კესარიაში აწამეს. საპყრობილეში უფალი კვლავ გამოეცხადა და ახალი სახელი, პროკოპი, უწოდა (ბერძნული სიტყვიდან, რაც „წინსვლას, წარმატებას“ ნიშნავს). საპყრობილიდან გამოყვანილი კერპებისთვის თაყვანისსაცემად წაიყვანეს, მაგრამ მისი ლოცვით კერპები დაეცნენ; ამის შემყურე მრავალმა ირწმუნა ქრისტე და მოწამეობრივად აღესრულა, მათ შორის რამდენიმე ჯარისკაცმა, სენატორთა წრის თორმეტმა ქალმა და წმინდანის დედამ, თეოდოსიამ. წმინდა პროკოპის, შემდგომი წამებისა და პატიმრობის შემდეგ, დაახლოებით 290 წელს თავი მოჰკვეთეს.