წმინდა ევფემია, ხელნაწერი ხატი

ხსენების დღე: 16 (29) სექტემბერი

წმინდა ევფემია ქალკედონიდან იყო და ქალწულებრივად ცხოვრობდა. ზოგის აზრით, ის დიოკლეტიანეს მეფობისას, 303 წელს ეწამა, სხვების აზრით — 307 წელს. მისი წმინდა ნაწილები კონსტანტინოპოლის საპატრიარქოში ინახება.

451 წელს, მეფეების — მარკიანესა და პულქერიას — დროს, ქალკედონში მოწვეულ იქნა მეოთხე მსოფლიო კრება ევტიქესა და მისი თანამოაზრეების წინააღმდეგ. ხანგრძლივი კამათის შემდეგ მართლმადიდებლობის დამცველმა მამებმა, რომლებიც 630 იყვნენ, ერთმანეთთან და მოწინააღმდეგეებთანაც შეთანხმდნენ, რომ თითოეულ მხარეს თავისი სარწმუნოების განსაზღვრება ცალ-ცალკე წიგნში დაეწერა და ღმერთისთვის ეთხოვათ, ჭეშმარიტება დაედასტურებინა. ტექსტების მომზადების შემდეგ ორივე ტომი წმინდა ევფემიას ნაწილების ლუსკუმაში ჩადეს, დაბეჭდეს და წავიდნენ. სამდღიანი ღამისთევის ვედრების შემდეგ იმპერატორის თანდასწრებით ლუსკუმა გახსნეს და აღმოაჩინეს, რომ მწვალებელთა ტომი მოწამის ფეხქვეშ იყო, მართლმადიდებელთა კი — მის მარჯვენა ხელში.