წმინდა ნექტარიოსი, ნაზარეთის ხატი

ხსენების დღე: 9 (22) ნოემბერი

წმინდა ნექტარიოსი 1846 წლის 1 ოქტომბერს თრაკიის სელიმბრიაში დაიბადა. კონსტანტინოპოლში დიდი შრომით მიღებული განათლების შემდეგ 1876 წელს ქიოსზე ბერად აღიკვეცა სახელად ლაზარე; სათნოების გამო ერთი წლის შემდეგ დიაკვნად აკურთხეს და ახალი სახელი — ნექტარი — უწოდეს. ალექსანდრიის პატრიარქ სოფრონის მფარველობით ნექტარი 1882 წელს ათენს გაემგზავრა სასწავლებლად; 1885 წელს ღვთისმეტყველების კურსი დაასრულა და ალექსანდრიაში წავიდა, სადაც პატრიარქმა სოფრონიმ 1886 წლის 23 მარტს წმინდა საბას ტაძარში მღვდლად აკურთხა, იმავე წლის აგვისტოში კი კაიროს წმინდა ნიკოლოზის ეკლესიაში არქიმანდრიტად აიყვანა. არქიმანდრიტი ნექტარი დიდ შურს იჩენდა როგორც ღვთის სიტყვის ქადაგებისთვის, ისე ღვთის სახლის შვენებისთვის. მან დიდად შეამკო კაიროს წმინდა ნიკოლოზის ეკლესია, და წლების შემდეგ, როცა ნექტარი ათენში იყო, წმინდა ნიკოლოზი სიზმარში გამოეცხადა, მოეხვია და უთხრა, რომ ძალიან მაღლა აღამაღლებდა.

ღვთისმოსავი დედების თხოვნით, 1904 წელს, როცა ჯერ კიდევ რიზარიოს სასწავლებლის დეკანი იყო, მან ეგინაზე წმინდა სამების დედათა მონასტრის მშენებლობა დაიწყო; შემდეგ, როცა დაინახა, რომ მისი იქ ყოფნა აუცილებელი იყო, 1908 წელს ეგინაზე დასახლდა, სადაც სიცოცხლის უკანასკნელი წლები გაატარა მონასტრის ხელმძღვანელობასა და უაღრესად მხურვალე ლოცვაში; ზოგჯერ ლოცვაში აღტაცებულს მიწიდან ამაღლებულს ხედავდნენ.