Молитва ко Пресвятой Богородице
Пою благодать Твою, Владычице, и молю Тя: ум мой облагодати, направи мя ходити путем заповедей Господних. Бодрити к песни укрепи мя, сном уныния одержимаго. Узы грехов моих разреши ходатайством Твоим, Богоневесто. В нощи и во дни сохрани мя от браней диавольских и избави мя. Живоносца Бога во чреве зачавшая, умерщвленна мя страстьми оживи. Невечерний Свет рождшая, душу мою омраченную просвети. О дивный Царев престоле, в храм Духа Святаго очисти мя. Врача всех рождшая, исцели души моея тяжкия страсти. Волнуемаго волнами мира сего к тишине мя приведи. Избави мя огня вечнаго и непрестанно мучащаго червия. Да не явиши мя бесом радость, многия грехи сотворшаго. Укрепи мя во брани страстей, Всенепорочная Дево. Муки всякия странна мя покажи и Богу всех благоприятна мя сотвори. Небеснаго радования сподоби мя улучити со всеми святыми. Пресвятая Дево, услыши моление недостойнаго и непотребнаго раба Твоего. Бездну слез подаждь ми, Владычице, да очищу скверну души моея. Воздыхание умиленное в сердце мое низпосли, Владычице. Немощное сие моление мое услыши, Святая, и Благому Богу принеси. Превышшая Ангел, превыше страстей мя покажи. Светом облеченная, благодать Твою во мне всели и благоуханна мя сотвори. Руце воздею и устне моя оскверненныя отверзаю к похвалению Тебе. Пресвятая, душетлительных страстей избави мя непрестанною Твоею ко Христу молитвою, Емуже подобает честь и поклонение, ныне и присно и во веки веков. Аминь.
