Молитвы об усопших
Песнь приношу усопшим в вере
Молитвами святых отец наших, Господи Иисусе Христе, Боже наш, помилуй нас.
Слава Тебе, Боже наш, слава Тебе!
Царю Небесный, Утешителю, Душе истины, Иже везде сый и вся исполняяй благодатию Твоею, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.
Святый Боже, Святый Крепкий, Святый Безсмертный, помилуй нас. (Трижды)
Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас; Господи, избави и освободи нас от грехов наших; Владыко, прости беззакония наша; Святый, посети и исцели немощи наша, имене Твоего ради.
Господи, помилуй (трижды),
Слава Отцу и Сыну и Святому Духу, и ныне и присно и во веки веков. Аминь.
Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго. Аминь.
Господи, помилуй. (12 раз)
Слава Отцу и Сыну и Святому Духу, и ныне и присно и во веки веков. Аминь.
Приидите, поклонимся Цареви нашему Богу. Приидите, поклонимся и припадем Христу, Цареви нашему Богу. Приидите, поклонимся и припадем Самому Христу, Цареви и Богу нашему.
Живущий под кровом Всевышнего под сенью Всемогущего покоится, говорит Господу: «прибежище мое и защита моя, Бог мой, на Которого я уповаю!» Он избавит тебя от сети ловца, от гибельной язвы, перьями Своими осенит тебя, и под крыльями Его будешь безопасен; щит и ограждение – истина Его. Не убоишься ужасов в ночи, стрелы, летящей днем, язвы, ходящей во мраке, заразы, опустошающей в полдень. Падут подле тебя тысяча и десять тысяч одесную тебя; но к тебе не приблизится: только смотреть будешь очами твоими и видеть возмездие нечестивым. Ибо ты сказал: «Господь – упование мое»; Всевышнего избрал ты прибежищем твоим; не приключится тебе зло, и язва не приблизится к жилищу твоему; ибо Ангелам Своим заповедает о тебе – охранять тебя на всех путях твоих: на руках понесут тебя, да не преткнешься о камень ногою твоею; на аспида и василиска наступишь; попирать будешь льва и дракона. «За то, что он возлюбил Меня, избавлю его; защищу его, потому что он познал имя Мое. Воззовет ко Мне, и услышу его; с ним Я в скорби; избавлю его и прославлю его, долготою дней насыщу его, и явлю ему спасение Мое».
Глубиною мудрости человеколюбно вся строяй и полезная всем подаваяй, Едине Содетелю, упокой души рабов Твоих (имена): на Тя бо упование возложиша, Творца всех и человеколюбиваго Бога.
Слава Отцу и Сыну и Святому Духу.
Помяни, Господи, яко Благ, в милости рабов Твоих (имена) и, елико в житии согрешиша, прости: никтоже бо безгрешен, токмо Ты, могий и преставльшимся дати упокоение.
И ныне и присно и во веки веков. Аминь.
Ты нам стена и пристанище и молитвенница благоприятная к Богу, Егоже родила еси, Богородице Безневестная, верных спасение.
Со святыми упокой, Христе, души усопших рабов Твоих, идеже несть болезнь, ни печаль, ни скорбь, ни воздыхание, но радость и жизнь безконечная.
Сам Един еси Безсмертный, Вседержителю, сотворивый и создавый человеки; земнии убо от земли создахомся и в землю туюжде пойдем, якоже повелел еси, создавый мя и рекий ми: яко земля еси и в землю отыдеши, аможе вси человецы пойдем, надгробное рыдание творяще песнь: аллилуиа.
Нас ради претерпел еси распятие и смерть, и адову силу пленил еси, и с Собою воскресил еси прежде умерших человек; сице и ныне упокой отшедших от нас, яко человеколюбивый Бог, и в страшное и грозное пришествие Твое, Жизнодавче, буди милостив верным людем Твоим по велицей милости Твоей и Царствия Твоего сподоби их.
Слава Отцу и Сыну и Святому Духу.
Кая житейская сладость пребывает печали непричастна? Кая ли слава стоит на земли непреложна? Вся сени немощнейша, вся соний прелестнейша: единем мгновением, и вся сия смерть приемлет. Но во свете лица Твоего, Христе, и в наслаждении Твоея красоты, ихже избрал еси, упокой, яко Человеколюбец.
И ныне и присно и во веки веков. Аминь.
Упокой, Спасе наш, с праведными рабы Твоя (имена) и сих всели во дворы Твоя, якоже есть писано, презирая, яко Благ, прегрешения их вольная и невольная и вся, яже в ведении и не в ведении, Человеколюбче.
Отверзи двери молитв наших и даруй нам милость Твою, и помяни, Господи, души, яже приял еси.
Духом Свет еси, Христе, и от святых славимый, молитву нашу ныне достойно приими, яко Свят, Свят, Свят еси, человеколюбивый и многомилостивый Боже; помяни души усопших (имена) и упокой их в селениях праведных.
Упокой души рабов Твоих (имя) с праведными и избранными Твоими, Христе Боже, слава Тебе.
Преступлением заповеди смерть обладала Адамом, Воскресением же Твоим от падения воздвигл еси его; молим Тя, Спасе: душам скончавшихся (имена) подаждь упокоение в Царствии Твоем, и елика согрешиша Тебе, прости, яко един Благ и Человеколюбец.
В страшное пришествие Твое, егда воздаси комуждо по делом, тогда ослаби и упокой души рабов Твоих.
На месте светлем и в лице праведных упокой, Спасе, к Тебе преставльшихся и на Тя уповавших, Человеколюбче. Приими моление об отцах и чадах, ихже память совершаем, и оправдай их, яко Многомилостив.
Помяни, Господи, души усопших в вечном Твоем наслаждении и упокой их.
Аще и древа ради преступлением заповеди смерть прииде на род человеческий, но силою Креста жизнь верным возсия. Ибо Ты — Царь живых и мертвых, Христе Боже: даруй рабам Твоим (имена) жизнь вечную и упокой их.
Души рабов Твоих упокой, Спасе, и в книгу живота впиши их.
Яко един Милостив, Благий, с верою к Тебе преставльшихся всели в небесное наследие, идеже есть наслаждение неизреченное и лик мучеников святый радуется.
Преставленных рабов Твоих всели в землю живых, Спасе, и сподоби их с благодарением хвалить Тебя, Сыне Божий.
Ты един был еси Человек кроме греха и Ты един милостью взял еси грехи мира; сего ради просим: упокой, Благий, усопших со святыми в наслаждении рая.
Сподоби нас, недостойных рабов, войти и водвориться в Царствии Твоем, и помяни, Господи, души, яже приял еси.
Сиянием света Твоего, Господи, озари к Тебе преставльшихся от волн мира сего и учини их с мучениками Твоими воспевать Тебя, Христе, во веки.
Тебе, Иже души усопших Ангелы в наслаждение рая пославшаго, Бога и Господа песньми величаем.
Вторый Адам, Адамов Создатель, воистину явился еси и клятву человеков един разрушил еси; и ныне, Благий, даруй душам усопших наслаждение рая.
Ты, имеяй власть над живыми и мертвыми, упокой души с верою усопших.
Смертию смерть умертвил еси, егда был еси един в мертвых свободь; и ныне, Владыко, от смерти греховной избави рабов Твоих и водвори их в Царствии Небесном.
Видите, видите Господа, Бога нашего, Сына Божия, Спаса мира и воскресение усопших.
Якоже даровал еси рай верному разбойнику, Спасе, тако и души верных Твоих с первенцами упокоения сподоби и прегрешений их оставление даруй.
Едине Благий, души рабов Твоих со избранными Твоими учини и упокой, яко Человеколюбец, Господи.
Христе, пришедый Избавителем нашим, преставльшияся души с Лазарем в лоне Авраамли милостью всели, яко на Тя имяху упование.
Учини во свете, Спасе, души рабов Твоих, яко Благ и един Всесильный Царь вечный.
Ходатай и Посланник мира Твоего был еси, Владыко, и давнюю вражду нашу к Тебе разрешил еси; и ныне рабов Твоих милостью упокой.
Христе Спасе, упокой души усопших (имена) в раю сладости со святыми Твоими.
Росою милостей Твоих, Христе, всякую скверну к Тебе преставльшихся рабов Твоих омый, Благий, и с Божественными воинствы небесными сочти их, да благословят Тя.
Помяни, Господи, души усопших и всели их в Царствие со святыми Твоими.
Доброты и светлости Твоея наслаждения сподоби усопших, Христе Боже, и последнее безобразие греха совлецы и очисти их от грехов, яко человеколюбивый Господь, ибо Ты един явился еси чужд греха.
Благий, душам, яже повелением Твоим приял еси, даруй упокоение, яко Милостив.
Молим Тя, Христе, сладкого Твоего общения сподоби души усопших и всели их в обитель праведных, в небесное жилище во дворех святых, милостью Твоею, и забуди согрешения их, и даруй, Спасе, упокоение.
Крепкий и Безсмертный Господи, с верою усопших (имена) учини во свете присносущном.
Человеколюбче Боже и Милостиве, буди милостив к созданию рук Твоих и упокой в небесных обителях с верою к Тебе преставльшихся и славы мучеников причастниками сотвори.
Господи, создания рук Твоих не презри, но упокой души усопших, яко Милостив.
Потоком сладости напаяеши избранных Твоих присно, Господи; и ныне сих усопших (имена) с ними учини и на водах прощения воспитай, Христе.
Преставльшихся в землю живых упокоения сподоби, Господи.
Живыми и мертвыми обладаеши, Владыко, и от земли воздвигаеши усопших; и ныне усопших всели во дворы Твоя и упокой.
Воскресый в третий день из гроба и поправый смерть, упокой, Господи, души усопших.
Молим Тя, Слове: ихже приял еси от нас, в лик избранных Твоих сочти и высочайшей жизни причастники яви.
Живот сый смертных, упокой, Господи, души скончавшихся (имена).
Тление наше облекл еси, Благий, и нетлением Твоим украсил еси и в безсмертное и треблаженное наслаждение возвысил еси, идеже водворитися сподоби, ихже приял еси.
Праведен и свят Господь, воскресый из мертвых и спасый человека.
Яко цвет увядает и яко соние мимоходит и разсыпается всяк человек; паки же вострубившей трубе, мертвии, яко в трусе, вси востанут ко Твоему сретению, Христе Боже: тогда, Владыко, ихже преставил еси от нас, во святых Твоих учини селениих души их, Благий.
Господи, истинным упованием воскресения даровавый наслаждение усопшим, и ныне рабов Твоих, отшедших от мира сего, водвори в жизни вечной.
Иже живыми и мертвыми, яко Бог, владычествуяй всеми, властию Жизнодавче, приими моление рабов Твоих, яви милость Твою, Человеколюбче, и даруй оставление душам, с упованием к Тебе преставльшимся, благоутробия Твоего ради, яко Благий.
Упокой, Господи, в раю сладости рабов Твоих (имя) и даруй им прощение грехов, яко Человеколюбец.
Христе Спасе, смертию Твоею избавивый человеки от смерти, души верных рабов Твоих всели в Божественное селение святых, отнюдуже отбеже всякая болезнь.
Господи, жало смерти сокрушил еси; и ныне молитвою нашею душам усопших (имена) даруй жизнь.
Кровию ребра Твоего, Всесильне, искупил еси мир; и ныне силою страданий Твоих спаси души верных Твоих, бывый избавление всем.
Господи, идеже есть всех веселящихся святых Твоих жилище, от века усопших верных сподоби наслаждения и не помяни грехов их.
Иже всех Царь сый, человеки ради их распятием спасл еси; сего ради молим Тя, Милостиве: усопшим даруй упокоение и оставление грехов подаждь.
Уповавшии на Крест Твой раби Твои к Тебе преставишася, Человеколюбче: милостью Твоею спаси души их.
В местех упокоения, яко Милостив, в лонех избраннаго Твоего Авраама наслаждения сподоби усопших, да вопиют Тебе, Едине: яко несть свят, разве Тебе, Бога нашего.
Господи, прощение грехов даруй усопшим (имена), упокой их и благодатью Твоею очищенными яви их.
Был еси Спас и Избавитель человеков святыми страданиями Твоими, Господи; сего ради, ихже избрал еси от нас, в вечных наслаждениях всели и сияние Божества излей на них.
Господи, ведый немощь естества нашего, Благий, души, яже приял еси, учини, идеже призирает Божественный невечерний свет лица Твоего.
Несть человек всесовершенно безгрешен, несть, токмо Ты един, безсмертный Царю; сего ради рабов Твоих во свете учини, Благий, с собором Ангелов милостью Твоею и даруй им оставление грехов.
Врата и вереи смертныя крепкия смертию Твоею сокрушивый, Избавителю, врата жизни и безсмертия отверзи душам усопших (имена).
Росою милостей Твоих, Христе, всякую скверну к Тебе преставльшихся рабов Твоих омый, Благий, и с Божественными воинствы небесными сочти их, да благословят Тя.
Мертв вменився со беззаконными, безсмертную жизнь даровал еси смертным; и ныне рабам Твоим, отшедшим от мира сего, даруй упокоение.
От неугасимаго огня и тьмы кромешныя, от скрежета зубов и червия ядовитаго, горькаго, и от иных различных мук избави, Избавителю, души верных.
Егда судиши всем, пред лицем Твоим нагим стоящим, тогда, Многомилостиве, послуживших Тебе с верою (имена) помилуй и упокой.
Невидимых и сокровенных Судие, егда явиши дела тьмы и советы сердец, тогда, Всесильне, не испытай дел моих и не истяжи слова и ответа с верою к Тебе преставльшихся верных, но даруй им прощение прегрешений.
Господи, приими память усопших и даруй им упокоение, чающим Божественного Твоего Второго пришествия.
Естеством сладкий и Многомилостивый, ихже от мира сего суетного и от сени смертныя приял еси, учини в Божественном Твоем свете и даруй прощение грехов.
Тебе, даровавшаго с верою усопшим со святыми Твоими во свете упокоение, Христа Бога и Спаса песньми величаем.
Велика и превелика милость Твоя, бездна неизмеримая, море человеколюбия Твоего: даруй усопшим прощение грехов и благодатью Твоею, Христе, очищенными яви их.
Тебе, Царю небесный и славы, души усопших (имена) со избранными Твоими сопричетшаго, Бога и Господа песньми величаем.
Достойно есть яко воистину блажити Тя, Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.
Слава Отцу и Сыну и Святому Духу, и ныне и присно и во веки веков. Аминь.
Господи, помилуй (трижды),
Господи Иисусе Христе, Сыне Божий, молитв ради Пречистыя Твоея Матере, преподобных и богоносных отец наших и всех святых, помилуй нас. Аминь.
Стихиры за души — поминовение усопших. Избраны из субботней службы об усопших Параклитика и из древнейшего Иадгари (литургико-гимнографический сборник VII–IX вв.).
Текст подобрала и подготовила к изданию Тинатин Мчедлишвили
